Vawiinah CYMA Cricket Final Durtlang Vs Ramhlun Venglai
Suaka Memorial Cricket Ground, Sihhmuiah vawiin tlai chhun dar 12:00 hian Durtlang leh Ramhlun Venglai ten CYMA Inter Branch Cricket Tournament final an khel ang.
Final Thlirna
Vawi hnih champion tawh Ramhlun Venglai leh 2007 champion Durtlang te hi 2006 CYMA Cricket final-ah an lo inhmachhawn tawh a, sulhnu nei ṭha zawk Ramhlun Venglai an chak.
Ramhlun Venglai tan tun ṭum hi final vawi ruk an luhna chiah an ni a, 2006 leh 2008-ah nomawi chawiin 2003, 2009 leh 2011-ah pahnihna an ni. RVL tana chanchin lawmawm chu final an luh hnuhnung pahniha an hneh loh CYMA Cricket hnuhnung pathuma champion Chanmari FC an hneh a, phuba duhawm tak an lak hi nomawiin a zui si loh chuan lawmna a famkim lo ang.
RVL hi veteran player Robert Lal-famkima'n a la ho a, big hitter Lal-chhuanliana chu chak pui tham player niin Mapuia Cricket League-a best bowler ni lai S. Lalmuanzuala an kawl a, kum 16-a upa Joseph Lalthankhuma pawh a naupan anga en chi a ni lo. Muanzuala leh Joseph te hi spin bowler ṭha an ni.
Captain Michael Lalhmachhuana'n all rounder hna a chelh a, Ramhlun Venglai hian champion an tum ruh hle.
Durtlang opening batsman Lalhruaizela leh KV Vanlalruata te hi tun inelnaa inkawp fuh ber an la ni a, kum 16-a upa Zothanzuala leh kum 19-a upa Henry Lalsangzuala te chu all rounder ṭha niin hmabak an nei eng hle.
Final Special
India sub junior team tan pawha lo khel K. Vanlalruata chuan, "Ramhlun Venglai hi U Robert-a'n a la ho thei a, ani hian kum 20 chhuang cricket a khel tawh. Tualchhung cricket tana a thawh hlawkna hi kan ngai hlu a, a remchan a dan a zirin guard of honour kan pe ang," tiin Vanglaini palai a hrilh.
Ramhlun Venglai coach Joseph Lal-felfamkima chuan, "Ramhlun Venglai hian Ruata theihna hi kan hrechiang si a, football-a a hun pum hmang tur chuan kan phal lo. MCL-ah kan lei chhuak a, team dangin keini aiin ngam huai mah se kan veng chhunga naupang duhawm tak tak chher hriam a duh avangin kan club a thlang. Amah hi kan veng tan chuan a pawimawh a, kan bowler-te'n an vawm hlum a nih pawhin zahna entir nan kan celebrate lo ang a, kan fan-te'n standing ovation an pe bawk ang," tiin Durtlang batsman Ruata an veng tana a hlutna a sawi lang.
Durtlang leh Ramhlun Venglai hian cricket academy an nei a, rawlthar ṭha rual awmna team inhmachhawn turah hian chak tur hriatthiam a har hle. Closing ceremony hi tlai dar 3:00-ah neih a ni ang a, chief minister Lal Thanhawla chu khuallian a ni ang.