Pathianni zanah Leicester City an champion dawn?

Leicester City manager Claudio Ranieri-a'n, "Tunah kan champion lo a nih chuan engtikahmah kan champion lo ang," tiin an dinmun thiam takin a sawi a, Pathianni zan dar 6:35-a Manchester United an hneh a nih chuan Foxes hian an club kum 135 chanchina a vawi khat nan Premier League nomawi an chawi ang.

A hma zawnga Premier League nomawi chungchang sawi duh ngai lo Ranieri-a'n a hun takah a naute fuih phurin, "Champions League kan khel dawn a, a ropui a ni. Mahse, tunah chuan Premier League champion nih kan duh a, kan theihna zawng zawng, kan rilru leh kan thlarau nen lam kan ṭang ang," tiin a sawiin season thara Champions League khelh tum Manchester United hna a hautak dawn.

Team Dinhmun

Leicester City striker chhuan-vawr Jamie Vardy chu West Ham laka red card a chawi hnuin FA-in match khat dang khel thei lo turin an hrem a, English striker hi Old Trafford-ah a inlan thei dawn lo.

England international inlan thei lo tur hi Manchester United tlarhnung tan thu lawmawm niin lang mah se Foxes-in Swansea City an khelh ṭumin an striker rinrawl tel loa an buai loh zia tilangin 4-0 in hnehna an chang a, Vardy aia lut Leonardo Ulloa-a'n goal hnih a khung.

Foxes manager Claudio Ra-nieri-a'n Manchester United a hmachhawn hnuhnung pakuaah vawi hnih chiah hnehna a chang thei a (W2 D5 L2), zanin an chak hian Premier League nomawi a pek tawh dawn avangin Italian manager hian a record duhawm lo hi siamṭhat a tum ang.

Leicester City hian an league match hnuhnung parukah tlawm hmel an hmu miah lo a, vawi nga hnehna changin vawi khat an khingpui an inhnehtawkpui thei. Premier League-a an tlawm hnu-hnung ber chu Feb 14-a Arsenal an hneh loh daih tawh kha a ni.

Manchester United-in an league match hnuhnung parukah vawi li hnehna changin vawi hnih an tlawm thung a, an hneh loh hnuhnung ber Tottenham Hotspurs hi Foxes ang thoa league nomawi beisei an ni a, Premier League champion tum Leicester hmaa United khelh dan tur hi hmuh a chakawm hle.

Herrera a zam lo

Manchester United midfiel-der Ander Herrera chuan Old Trafford-ah Leicester City chu champion tir an tum loh thu sawiin, "Kan ngaihtuah chu Manchester United chauh a ni a, Champions League khelh kan la beisei avangin theihtawp chhuahin kan khel dawn a ni," tiin season thara Champions League khelh ngei an tum thu a sawi.

Herrera chuan sawi chhun-zawmin, "Leicester City hian Premier League nomawi chawi an phu a, champion nih an phu a ni. Mahse, Old Trafford-ah ni loin anmahni khelmualah an champion chu lawm rawh se. Keini chu Manchester United kan ni a, hnehna chan zel hi kan duh a ni," tiin tih mai mai a tum lo.

A tak ramah

Premier League match thum khelh hmabak an la neiha champion tura point thum chiah mamawh tawh Leicester City boss Claudio Ranieri chuan, "Tunah chuan kan mumang kha a tak ramah kan chantir a hun ta a ni," tiin Swansea an hneh zawhah a sawi a, mumang rama an chen mek thu sawi ṭhintu Italian manager hian mumang chu a tak ram ngeia chantir a duh tawh.

A english hman ṭhin maksak leh a ṭawngkam dangdai taka avanga lawm hlawh manager chuan zangkhai taka an inkhelh tur thu sawiin, "Italy-ah club lian tak tak ka enkawl tawh a, chutih laia ka pressure neih ṭhin chu sawi ila in awih lo hial ang. Leicester-ah hian eng boruak rit mah ka tawng lo a, he hmuna awm hi a nuam a ni," tiin league nomawi chawi turin pressure a neih loh thu leh a talbuai loh thu a sawi.

Juventus leh Inter Milan boss hlui chuan sawi chhunzawmin, "Tun season hi chu a danglam bik a, tuna kan champion loh chuan kan champion tawh lo ang ka tih chhan pawh hei hi a ni. Season tharah chuan club liante hi an lian lehzual tawh dawn a, tun season-ah hian kan champion ngei a ṭul a ni," tiin league nomawi chawi a tum ruh hle.