Mizoram Super League champion Khatla TBL Khatla TBL
Mizorama basketball inelna sang ber Zothan Auto Works Mizo-ram Super League Season 2-ah Khatla TBL an champion. He inelna hi Zirtawpni zan khan Hawla Indoor Stadium-ah a ṭiak ta a, stadium-a leng lo basketball ngainatu Republic Vengthlangah an pungkhawm.
Finals game 3-ah Khatla TBL-in ṭan phat aṭanga inkhel tawp thlengin Tuikual South lakah an chungnunzia lantirin 86-74 in an chak a, MSL history-a champion zawn thei leh nomawi chawi thei awm chhun an ni.
Champion team Khatla TBL-in Rs 1,20,000 an dawng a, pahnihna Tuikual South-in Rs 60,000 an dawng ve bawk.
TBL champion-na kawnga player thawhhlawk Vanlalmuana chu Most Valuable Player-a thlan a ni a, Tuikual South thiampuipa Vanchuangpuia chu Defensive Player of the League-ah thlan a ni. Mimal lawmman dawngtute hian Zothan Auto Works aṭangin Bajaj Microwave Oven an dawng ve ve.
Vanneih tum
Tuikual South-in game hma-sa ber an la a, game 2-a Khatla TBL an chak let ve chiah khan an intluktawk chiah. Amaherawhchu Phengphehlep hian game 3
ṭan hma aṭangin India captain Vishesh Bhriguvanshi leh Pratham Singh-a te telna hi an chung en a, an thlen chinah an lungawi tih an sawi nasat ang chiahin an khelh danah pawh pahnihna nih pawi an ti lo.
Final inkhel pawimawh takah TKS-in an player neih ṭhat ber Rakesh chu second quarter tawp hma minute li leh second 44-ah chiah an luhtir a, vanneih beiseiin an khel a ni ber.
Inkhelh ṭan hma aṭangin a tawpa 'comeback' an tum a ni ber a, an thiampuipa tel loin TKS-in bul an ṭan a, an tuar ta a ni.
Final pressure sangah TKS player-te'n ṭum danga an luh theihnaah an lut lo - first quarter zawha point chu 22-8 niin TBL an fâl vang ai mahin Phengphelep khelh dan hmang vangin chak tur a chiang nghal der.
Eddie & Vishesh
Khatlain nomawi chawi nawn duhin Vishesh an la lut a, India captain hian nomawi a keng tel. India captain Vishesh hian Mi-zoten hma-sawnna tur an la ngahzia court chhung-ah fiah takin a rawn lan-tir. Awlsam hmel si, hmuh-nawm bawk si, ṭang-kai bawk sia khel thei Vishesh hi MSL2 mawitu a ni.
India captain ringawt tan team chakpui theih a ni lo a, Khatla tan an veng tlangval Eddie Zai-thanmawia chu TBL thahrui pawimawh a ni. MSL1-ah squad tichhahtu ringawt nimah se MSL2-ah Eddie hi MVP ni tlak khawpin hma a sawn a, first quarter-a TBL falna chhan hi Eddie a ni.
TKS nge nge
Court chhungah Khatla TBL an chungnung a, mipui lam-ah erawh beidawng duh lo Tuikual South an chungnung leh hle. 'Comeback' tia Tuikual South
ṭantute au rualin beiseina a siam a, tawnhriat nei ṭha Khatla TBL an talbuai phah hial.
Vanchuangpuia leh Rakesh te'n Phengphehlep tan beiseina thar an siam a, defensive lama thawkrim captain F. Zodinthara offence lamah a ṭangkai tawk lo.
Rakesh a luh hnuah game a danglam a, an inthlauhna a zim sawt a; nimahsela an khêk rei deuh a, an tuar tluan ta a ni ber.
Tuikual South-in squad an neih chhah tawk loh an tuar a, quarter tawpna berah an inthlauhna point nga chauh ni hman mah se an
ṭang tluan thei lo.
A hunah MVP
Minute khat leh second 35 chiah a awm tawh tiha point din-hmun chu 79-74 a ni a, hahchawl tura ṭhu tawh India captain Vishesh-a luh leh a ṭul a, Khalta TBL tana pawimawh ber erawh hun harsaah coach Mapuia a talbuai lo.
Point nga chauha an inthlauh lai hian Jacob Laldinliana'n freethrow vawi hnih a lut a, India captain Vishesh-a pass chu Vanlalmuana'n three-point line pawn aṭangin a lo thun nalh. MVP-a thlan zui tak Dawrpui Vengthar tlangval Muana'n Tuikual South beiseina a titawp a, 86-74 in inkhel a tawp zui bawk.
Vishesh leh Mapuia uapna hnuaiah TBL player zawng zawng an inringtawk vek a, game 3-ah hian freethrow vawi 30-ah vawi 23 (76.67%) an lut - tualchhung basketball-in hma a sawn tih a chiang.
Chak lo chunga lawmna
MSSC aṭanga Tuikual South-in coach atana an lak KC Lalliantluanga chuan, "MSL buatsaihtu MBBA chungah ka lawm a, Zonet inpeknaah ka lawm bawk. A hlawhtlinna tur a tel club zawng zawngte thawhrimna leh inpekna a ropui ka ti. TKS enkawl theia office lam aṭanga phalna min petu MSSC secretary chungah ka lawm em em bawk. Club hruaitute leh fans club hruaitute, club hruaitute leh coaching staff te chungah ka lawm bawk. Kan player te, MSL inbuatsaihna a tana practice session 103 lai ka neihpuite chungah ka lawm a, theihtawp chhuah ka phut a, anni hian ka phut chu an tihlawhtling vek a ni," tiin lawmthu a sawi.
Tuikual South ṭantute theihngilh loin KC-a chuan "Kan inkhel zawng zawnga min ṭan tlattu, kan hniam ber lai pawh a min au phur rengtu Tuikual South veng chhung leh pawn a min ṭantute zawng zawng chungah ka lawm takzet. A tawp berah chuan Pathian hnenah lawmthu awm sela, thawhrim min phalsaktu mai ni loa kan thawhrimna mal min sawmsak a, kan phu loh chawimawina min pek avangin Lalpa chu ropui ber rawh se," tiin Vanglaini palai a hrilh.
Champion thukhawchang
SYS aṭanga Khatla TBL-in coach atana an lak H. Laldinsanga chuan, "Hun tawp lamah khan tlem chuan min hnaih bawk mah se hlauhthawnna kan nei lo. Kan player-te'n tawnhriat an nei ṭha a, court chhungah an tihtur an chiang em em a ni. Tun dinhmun kan thlen theih avangin club hotute chungah leh player-te chungah ka lawm em em a, kan vai thawhrah a ni. Ka sawi belh duh chu ka tan chuan Khatla TBL ṭantute aia ṭha an awm lo," tiin an champion chu team thawhrah a nih thu a sawi.
Khalta TBL ṭantute'n Tuikual South pha lo deuh mah se supporter ṭha tia sawi tur erawh an ni phak hrim hrim. Inkhelh ṭan hma darkar khat la awmin an ṭhutna lam a khat vek tawh a, dinhmun ṭhat laiin player-te phur lehzual nan an au rual bawk.
Khatla TBL general secre-tary Samuel Lalfana chuan, "Pathian min awmpuina vanga champion thei kan ni. Kan club ṭantu Khatla veng chhung leh veng pawn aṭanga Hawla Indoor Stadium pungkhawm te chungah lawmthu kan sawi. Team vanduai zawk Tuikual South te kan tawrhpui a, final hmuhnawm tak an chhawp chhuah theih avangin an chung-ah pawh lawmthu kan sawi," tiin Vanglaini palai a hrilh.
Champion team chu
Sl. No. Hming Address
1 H. Laldinsanga Saron Veng
2 Vanlalnunsanga Khatla
3 Julian Lalramdinthara Mission VT
4 Vanlalmuana Dawrpui VT
5 Lalrinzuala Dawrpui VT
6 Jacob Laldinliana Tuikual North
7 Lalrinpuia Hlondo College Veng
8 Eddie Zaithanmawia Khatla
9 Andrew Lalmalsawma Republic Veng
10 David Lalrinchhana Tlangnuam
11 Pratham Singh Uttar Pradesh
12 Vishesh Bhriguvanshi Uttar Pradesh
13 Jordan Lalchhanhima Khatla
14 R. Lalmalsawma Tuikual North
15 Gospel Lalthawmmawia Khatla
Team Officials
Coach : H. Laldinsanga
Asst Coach : Vanlalnunsanga
Manager : Lalawmpuia Pachuau