United tan Martial

Manchester United-in Inrinni zan khan Wembley Stadium-ah Everton 2-1 a hnehin FA Cup final an lut. Red Devils hian May 21 hian nizana inkhel Crystal Palace leh Watford chak zawk nen nomawi an inchuh ang.

Marouane Fellaini-a'n minute 34-naah Anthony Martial thawhrah sengin a club hlui lamah goal a khung a, French rawlthar duhawm hian injury time-ah chakna goal a khung.

United goal khung inkar hian Romelu Lukaku penalty pet chu Spanish keeper David de Gea-a'n a dan sak a, ding lam aṭanga Gerard Deulofeu cross chu United defender Chris Smalling-a'n minute 75-naah an lamah a ti lut thung.

Louis van Gaal-a ho-ten first half thunun mah se second half lama tlarhnung an talbuai avangin keeper De Gea chu team chhandamtu a ni.

United boss Louis van Gaal chuan, "Inelna bak engmah ka ngaihtuah lo. Hmalam hun atan tunah hian theihtawp kan chhuah a, ka chungchang chu club thuneitute nen kan sawi ho ang," tiin a hna aia FA Cup nomawi a ngaih pawimawh zawk thu a sawi.

Kum 64-a upa Dutch manager hian final thlen an phu thu a sawi rualin referee-in inkhel a thunun ṭhat tawk loh thu a sawi bawk.

Manchester United hian FA Cup final a vawi 19 nan an lut a, Arsenal record an nih rual chiah. Kum 2004 hnuah United hi an la champion leh lo a, tun season-ah nomawi an chawi a nih chuan vawi 12 champion Arsenal record an tluk pha leh bawk ang.