Mizoram rawlthar thiam ber Tanhril
Tanhril chu Mizorama rawlthar football thiam ber an ni ta. Inrinni tlai khan All Mizoram Under 16 Inter LC/VC Football Tournament 2016 chu a hmawr bawk a ni a, Tanhril chuan hun pangngaia goal a luh loh hnuin penalty shootout-ah Kawnpui VC III chu 4-1 a hnehin champion nomawi an chawi.
Tanhril vannei
Lammuala inkhelah team enkawl lama tawnhriat nei ngah Chawngthansanga'n an khingpui hlauhawmzia a hria a, match ruk an khelh aṭanga goal khat chauh chhuaha goal 17 khung thei Kawnpui lakah a fimkhur. Captain Isaac Lalruatpuia chu tlarhmaah maltlat tirin midang zawng chuan goal khung aiin a venhmin hna an thawk ngawrh zawk.
Kawnpui lamin inkhel bul an
ṭan fuh zawk a, na takin an nawr nghal. Lalhmingmawia freekick pet bakah E.M.S Tluangzela long shot ṭha tak mai chu Tanhril keeper Lalruatdika'n a dansak a, counter attack aṭangin Lalrinmuana'n goal khungna hun ṭha nei mah se goal ban hrulah a pet chhuak hlauh, Tanhril an vannei.
Fuh lo chu
Inkhel chanve zawh hma hretin Kawnpui player Malsawmkima chu ṭul lo taka Lalnunthara kut a thlak avangin hnawhchhuah a ni a, Kawnpui hi player pakhatin an kim loh phah a ni mai lo a, an boruak tichhe zuitu a nih vangin team tan a pawi hle.
Tanhril lam an phur thar a, Lalrohlua cross ṭha tak mai chu striker Isaac Lalruatpuia'n chiang zetin a khung a, mah se offside vangin pawm a ni lo.
Tanhril lamin tam zawk an nihna an chhawr ṭangkai thei lo a, Kawnpui tlarhnung Lallawmsanga, Lallawmawma, Lallawmsanga leh J. Lalchhuanpuia te an dingkhawng tlat, hun pangngai leh extra time khelh zawhah goal a lut lo.
An hril zel ang
Tanhril midfielder Vansangkima a hmuhnawm a, Isaac-a tan ball a thawn luh zauh zauh bakah Eliza Lalhmachhuana nen Kawnpui tlarhnung an su nghing fo a, ball mawi tak taka inpe kualin an thiamzia an pho lang. Anni pahnih bakah Tanhril rawlthar duhawm tak takte te hi nakin zel thlenga an chanchin an hril chhunzawm zel a nih pawhin an mak lo ang.
Round hmasa lamah Tanhril hian Darlung leh Venghnuai te chu penalty shootout aṭangin an lo hneh tawh a, final nen hian penalty-ah vawi thum hnehna an chang. A player neih hmangthiamtu coach Chawnga a fakawm a, an champion theih nana an player 12-na Tanhril mipui hmuhhmaih theih an ni lo bawk.
Eng nge an sawi?
An veng champion puitu coach Chawngthansanga chuan, "Inkhel pumpui thlir chuan kan khel ṭha tawk lo a, Kawnpui khan an khel
ṭha mah zawk. A tawpah chuan kan beidawn duh loh vangin nomawi kan chawi a, kan vannei a ni," tiin Vanglaini palai hnenah inkhel chungchang a sawi.
MPL club Reitlang FC leh Chanmari West coach hlui Chawnga chuan sawi chhunzawmin, "Kan manager Betsy Lalhlimpuii Hmar hian kan hlawhtlin theih nan a thawhhlawk em em a, ani hian tunhma lam aṭangin Tanhril rawlthar ho hi an lo kaihruai tawh ṭhina, tunah a rah kan hmu a ni," tiin an manager hnahthawh a theihnghilh lo.
Kawnpui coach Lalnunthara chuan, "Kan thlen chinah kan lawm a, ka nauten an khel ṭhain kan vanduai vang chauha champion lo mai kan niin ka hria. Referee thutlukna khan inkhel a ti danglam a, kan tan chuan pawm thiam a har. Min ṭawiawm tura mipui tamtak lo kal khawm khaw mipui chungah kan lawm a, champion team Tanhril kan lawmpui e," tiin Vanglaini palai a hrilh.
Pathumna Tuikual North
Final inkhelh hmain pathumna zawn a ni a, Tuikual North chuan si an phurh zet hnuah Kanan chu 4-1 a lehthalin pathumna dinhmun an luah a, fairplay award an dawng bawk.
Kanan tan Lalhruaizela chuan minute 16-na lekah goal hmahruai a khung nghal, he hian Tuikual North a beng harh zâwk a; Lalruatpuia leh R. Lalhruaizela te goal hnih ve ve hmanga chhang letin an chak chiang hle.
Penaty pet dan
Tanhril Kawnpui VC III
Isaac Lalruatpuia G E.M.S Tluangzela X
Eliza Lalhmachhuana G Lalhmingmawia X
Lalhruaizela G J. Lalchhuanpuia G
Lalrinchhana G
Note : G = Goal; X = Goal lo
Lawmman
Champion Tanhril Rs 70,000
Pahnihna Kawnpui VC III Rs 40,000
Pathumna Tuikual North Rs 20,000
Fairplay Tuikual North Rs 10,000
Top Scorer Lalruatpuia Zemabawk (Goal 4) Rs 2,000
Best Player Vansangkima Tanhril Rs 2,000