Lianzuala chet ṭhat a tawk zo lo

Mizo tlangval Lal-lianzuala Chhangte-in Chennaiyin tan inkhel hmuhnawm pho chhuak mah se a team tan point thum a hlawh chhuak zo lo a, Mumbai City lakah 2-1 in Chennaiyin an tlawm. 

South Indian club hian minute 40-naah Jakub Sylvestr hmangin goal hmahruai an khung a, Slovakia international goal khung siamsaktu hi Lallianzuala a ni. 

Lunglei tlangval hian Mumbai City defender pahnih ven karah ball a khalh tlang a, Sylvestr tan khung loh zahthlak khawpa ṭhain a siamsak - Israeli Premier League club Hapoel Haifa aṭanga Chennaiyin zawmtu hian goal ruakah a khung. 

Mahse, Mumbai tan Hernan Santana leh Adam Le Fondre-te chuan an chhanglet a, hun a tawp meuh chuan 2-1 in Mumbai City an chak ta zawk - Lianzuala'n goal khungna remchang nei mah se Amrinder Singh a paltlang thei lo. 

Lianzuala chuan, "Kan khelh ṭhat ber ṭum a ni hial mai thei a, mahse football-ah chuan chak inbeisei ṭum pawha chak loh chang a awm miau si - ka ui takzet a ni. 

"Set piece-ah duh aiin rilru kan pe tawk lo deuh bawk niin ka hria a, tun aia ṭha zawka inkhel turin kan inbuatsaih chhunzawm ang. Keima mimal bikah pawh hmasawnna a awm zel a, hei aia ṭha zawk tura inbuatsaih zel erawh ka tum. 

"A pawimawh ber erawh hnehna chan a ni a, mahni khelh danah lawm mah ila point thum hmuh loh chuan lawm a kim thei lo a ni," tiin Vanglaini a hrilh. 

Chennaiyin tan Jerry Lalrinzuala chuan inkhel bul a ṭan bawk a, Lalchhuanmawia Fanai erawh hliam vangin squad-ah a la awm thei lo thung. 

Zanin dar 7:30-ah inkhel pakhat a awm leh dawn a, ATK Mohun Bagan chuan Hyderabad FC an mikhual dawn. HFC-ah hian goalkeeper Lalbiakhlua Jongte, midfielder R. Laldanmawia, Mark Zothanpuia leh striker Lalawmpuia te an awm.