Goal ngain nomawi a lei thei lo 2015-16 I League champion Bengaluru FC

Inrinni zan khan Kanchenjunga Stadium, Siliguri-ah season liam ta champion Mohun Bagan-in Cornell Glen goal hnih (8', 66') bakah Lenny Rodrigues (21'), Luciano Sabrosa (23') leh Azharuddin Mullick (28') te goal hmangin champion thar Bengaluru FC chu 5-0 in an sawp.

Mariners striker Jeje Lalpekhlua chu hahdamtir niin second half-ah a inlan chauh a, minute 70-naa Mizo tlangval goal khung hi offside vangin pawm a ni lo. Mohun Bagan hian goal nga tehmeuh khung mah se pahnihna dinhmun bak an nemnghet thei lo a, vawi 16 khelh zawha point hmu sang ber Bengaluru FC an champion.

Bengaluru FC coach Ashley West-wood chuan, "Nomawi kan chan phah lo a, India ram champion kan ni. Nilainia AFC Cup (Lao Toyota) kan khelh dawn avangin player ṭha ka chawlhtir a, Mohun Bagan hian ka starting eleven ni loin reserve team an hneh a ni," tiin
ṭawngkam a duhtui lo.

I League champion team-ah hian Mizoram player panga Beikhokhei (Saiha), Lalthuammawia (Champhai), Lalchhuanmawia Fanai (Lengpui), Malsawmzuala (Chaltlang) leh Daniel Lalhlimpuia (Serchhip) te an awm a, champion-na kawngah player pawimawh an ni.

Inrinni zan inkhel dangah Sporting Goa-in Pratesh Shirodkar (6’), Sumeet Passi (30’) leh Victorino Fernandes (83’) te goal hmangin Goan Derby-ah Salgaocar FC chu 3-0 in an hneh.

Mimal chawimawina

Champion team Bengaluru FC-in nomawi an chawi zan hian position hrang hranga cheṭhate puanchhuah niin player leh coach chawimawina hi AIFF thlan a ni.

Besh Coach Ashley Westwood

Hero of the League Sony Norde

Best Goalkeeper Amrinder Singh

Best Defender John Johnson

Best Midfielder Eugeneson Lyngdoh

Best Forward Ranti Martins