Bayern ban phakah nomawi

Bayern Munich chuan a zawna Bundesliga champion ṭum li ni turin vawi khat chak bak an mamawh tawh lo, point 81 hmuin inkhelh hmabak match thum chiah a awm tawh a, Borussia Dortmund nen an inthlauhna chu point sarih a ni.

Inrinni zan Bundesliga inkhelah Bayern hian Arturo Vidal leh Douglas Costa te goal khung hmangin Hertha Berlin 2-0 in an hneh a, Pep Guardiola naute hi champion thei dinhmunah an ding hman.

Mahse, inkhel dangah Dortmund chuan Shinji Kagawa, Christian Pulisic leh Henrik Mkhitaryan te goal khung hmangin Stuttgart 3-0 a an lo hneh ve avangin Bayern champion tur an lo pawt khawtlai rih.

Bayern hian Nilaini zan hian Champions League semifinal khel turin Atletico Madrid khelmual an pan dawn a, hemi hre ran hian captain Philipp Lahm pawh hahchawlh tir a ni. Tunkar Inrinni zana league lama an mi-khual tur Borussia Mon-chengladbach lakah hnehna an chang zui a nih chuan an champion tawh ang.