City chak chiang; Magpies tan beiseina

Inrinni zan Premier League inkhelah Manchester City chuan 4-0 a Stoke City sawpin Champions League an beisei zel a, Rafael Benitez chuan Anfield-a a kir lehna inkhelah Newcastle United chu point khat hlu tak a hlawhchhuah pui bawk.

Premier League-a beisei tur nei tawh lo Chelsea chuan 4-1 in Bournemouth an sawp a, Blues tan chanchin lawmawm erawh Eden Hazard-a'n tun season-a a league goal hmasa ber a khung hi a ni.

City chak chiang

Thawhlehni zana Real Madrid mikhual tur Manchester City-in Spanish club tan lak lap chi an nih lohzia Inrinni zan Premier League-ah an pholang a, an mikhual Stoke City chu 4-0 in an sawp.

Manchester City tan Fernan-do-a'n goal hmahruai a khung hnuah Kelechi Iheanacho penalty hlawhchhuah chu Sergio Aguero-a'n goal-ah a chantir a, kum 19-a upa Iheanacho hian goal hnih dang a khung bawk.

City manager Manuel Pelle-grini chuan, "Team lian chuan league leh Champions League-a ngai pawimawh ve ve tur a ni a, team lian chuan hei hi kumtin kan ti tur a ni," tiin Champions League semifinal an luh vanga Premier League an ngaihnep loh thu a sawi.

Magpies an tlo

Liverpool manager hlui Rafael Benitez-a'n Anfield-a a kir zanah a team chakpui zo lo mah se Liverpool laka si hnih an phurh zet hnuin point khat an hlawh chhuak a, Spanish manager hnuaia Magpies khelh danin fak a hlawh hle.

First half-ah Reds-in Daniel Sturridge leh Adam Lallana hmangin hma hruai mah se Newcastle-in chawlhlawka an thu ngaihthlak an chhawr ṭangkai a, second half-ah Papiss Cisse leh Jack Colback hmanga an si phurh sutin Premier League-ah beiseina an la nei ve zel.

Newcastle manager Rafa Benitez chuan a team hlui a la hmangaih reng tih tilangin, "Team ṭha tak lakah point khat hlu tak kan hlawh chhuak a, Europa League-ah ṭha taka khel turin Liverpool hi ka duhsak a ni," tiin Reds chu Europa kaltlanga Champions League khel turin a duhsakna a hlan.

Hazard a harh!

Season hmasa Premier Lea-gue player of the year Eden Hazard-a'n league match 29 chhung goal a khung loh hnuah goal hnih a khung a, Pedro leh Willian-ten goal khat ve ve khung bawkin an mikhualna ramah Bournemouth chu 4-1 in an sawp. Mualneitu team tana Tommy Elphick goal khat khungin awmzia a nei thui lo.

Chelsea manager lailawk Guus Hiddink chuan, "Kan khelh dan avang khan kan lawm takzet a ni. Tun hnai ni 10 chhung khan Eden Hazard bik hi kan buaipui nasa a, a ṭhat dan bera a khelh chhuah leh hi kan duh ber a ni. A tawpah chuan kan mamawh chhanna min pe a, a khel ṭha takzet a ni," tiin Belgian winger chu a fak.