League Cup champion PSG

Paris St-Ger-main chuan 2-1 a Lille hnehin France-Coupe de la Ligue (French League Cup) no-mawi an chawi a, kumiah Ligue 1-ah champion tawh bawkin title pahnih an lakna chiah a ni.

Laurent Blanc-a naute hian Argentina international pahnih Javier Pastore leh Angel di Maria te hmangin goal an khung a, Lille goal neih chhun hi freekick aṭanga Djibril Sidibe chhuih luh niin PSG midfielder Adrien Rabiot chu hnawhchhuah a ni thung.

PSG hian nikum lama an lo tih tawh angin season khata nomawi pathum chawi theihna hun an nei dawn a, May 21 khian Marseille nen Coupe de France (French Cup) final an la khel dawn bawk.

A zawna a vawi thum nan PSG hi French League Cup champion ni mah se Champions League-a beisei ang result an neih theih loh avangin manager Blanc hmalam hun a chiang lo niin sawi ni mah se Paris Saint-Germain president Nasser Al-Khelaifi chuan season tharah pawh manager ngai an la hman tur thu a sawi tak avangin Blanc hi an banin a rinawm ta lo.

French manager Blanc chuan, "Kan hna a la zo lo a, nomawi chawi hmabak pakhat kan la nei. Champions League-ah hlawhtling rih lo mah ila League Cup nomawi hian kan rilru a chhawk zangkhai ngei ka beisei," tiin a sawi.