Pietersen a inhliam; Kohli a ropui zel

Zirtawpni zan Indian Premier League inkhelah Virat Kohli chuan run 80 vaw chhuakin Rising Pune Supergiants lakah Royal Challengers Banga-lore chu run 13 in hnehna a chanpui a, Pune batsman Kevin Pietersen chu hliam vangin lak chhuah a ni thung.

Pune hian over 20 chhungin run 185 siamin mi pathum an hloh a, run 80 siamtu Kohli bakah run 83 vaw chhuaktu AB de Villiers a khel ṭha hle.

Pune tan run 60 siamtu Ajinkya Rahane leh run 41 siamtu captain MS Dhoni-te chet ṭhatin awmzia a nei thui lo a, over 20-ah mi pariat hloha run 172 vaw chhuakin a tlawm zawkah an ṭan a ṭul ta a ni.

Inrinni tlai inkhelah Delhi Daredevils chuan run 10-in Mumbai Indians an hneh bawk a, Delhi tan run 60 siamtu Sanju Samson leh run 49 siama a tawp thleng dam JP Duminy-te an khel ṭha hle.

Delhi hian over 20 chhunga run 164 siamin mi pali an hloh a, over 20-a run 154 siama mi pasarih hlohtu Mumbai Indians chu a tlawm zawkah an ṭang ta a ni. Mumbai tan run 65 siamtu captain Rohit Sharma chuan a naute tan entawn tur hnutchhiah ṭha viau mah se a hnung zui zo a naute zingah an awm lo.

Kings XI Punjab-in ngai an awh hleithei lo a, Inrinni zan khan Sunrisers Hyderabad lakah wicket ngain an tlawm. Punjab hian over 20 chhunga run 143 siamin mi paruk an hloh a, Hyderabad tan David Warner (59) leh Shikhar Dhawan (45) te an chet ṭhat avangin over 17.5-a an target umphaa mi panga hlohin mualneitu Hyderabad hi chak zawkah an ṭang ta a ni.

Zanin dar 8:00 hian Kings XI Punjab leh Mumbai Indians an inhmachhawn ve leh ang.