La Liga Suarez ropui zanah club lian an chak kim

Luis Suarez-a'n Deportivo La Coruna laka goal li ngawt a khung hnu lawkah Sporting Gijon goal net-ah vawi li ngawt a thlawh lut leh a, 6-0 in Barcelona chu hnehna a chanpui.

Cristiano Ronaldo inlan theih loh zanah Real Madrid an talbuai ṭhelh a, mah se khawvela player man to ber Gareth Bale an la kawl miau avangin 3-2 in Rayo Vallecano an lehthal.

Atletico Madrid pawhin champion an beiseina chhi nung turin Malaga chu 1-0 in an hneh a, league table-ah hmahruaitu Barcelona nen an point hmuh zat a in ang zel.

Hmalam panin Suarez

Inrinni zan khan Barcelona-in Nou Camp-ah Sporting Gijon an mikhual a, an mikhual lakah ṭhat chhuah duh loin 6-0 ngawtin an lo sawp. Barca tan Lionel Messi-a'n goal hmahruai a khung hnuah Suarez-a'n goal pangngai vawi hnih a khung bakah penalty aṭangin vawi hnih a khung bawk a, Neymar chuan hun tawp dawnah penalty aṭanga khung ve lehin Barca an chak chiang hle - Brazil captain laka penalty chawitu Ognjen Vranjes chu hnawhchhuah a ni.

Luis Suarez-a'n league match-ah goal 34 khung tawhin goal 31 khungtu Cristiano Ronaldo chu La Liga top scorer dinhmun luah turin a lehpel a, Uruguayan striker hi minute 85 dan zela goal khat khung ang a ni. Suarez hian top scorer ni chunga season a khar thei a nih chuan kum 2008-09 a Diego Forlan-a'n La Liga top scorer dinhmun a luah hnua Ronaldo emaw Messi emaw tih loha he dinhmun luah thei hmasa ber hi a ni dawn a ni.

Bale a inlar

Rayo Vallecano khelmualah Real Madrid-in si hnih phur hmasa zet mah se Gareth Bale-a'n goal hniha a chhan let bakah Lucas Vazquez-a'n goal khat dang a khung ve leh bawk a, khualmualah Real-in 3-2 a hnehna changin Barca an um ve zel.

Real hian Villarreal an hneh ṭuma inhliam Ronaldo an chhawr thei lo a, Real ma-nager Zinedine Zidane-a tan a chanchin lawmawm lo leh dang chu hliam vangin striker Karim Benzema chu first half-ah lakchhuah a ni.

Thawhlehni zana Man-chester City khelmuala Cham-pions League semifinal first leg khel tur Real tan French striker inhliam hi a hun lo hle. Zidane chuan a striker inhliam hi an zirchian phawt tur thu sawiin Ronaldo erawh City hmachhawn tura an hruai tur thu a ti chiang thung.

Atletico chak

Atletico Madrid-in Malaga an mikhualna inkhelah manager Diego Simeone chu bench-a ṭhu thei lo tura hnawhchhuah ni mah se Atletico hian Angel Correa goal khat khung hmangin hnehna an chang ta tho a, La Liga nomawi an beisei chhunzawm zel.

Argentine manager rorum Diego Simeone hi second half-ah referee Antonio Mateu Lahoz chuan a hnawt chhuak a, player a nih lai pawha che rorum thei tak manager hi inkhelh laia ball dang vawm lutah a puh. Simeone hi ball vawm luttu ngei a ni tih finfiahna awm lo mah se ball hi Atletico bench
aṭanga lut a nih avangin mana-ger hian mawh a phur ta a ni.