A chung berah Belgium

FIFA ranking chhuak tharah Belgium chuan pakhatna dinhmun an luah chhunzawm a, tun hnai kum thum chhung chu world number 1 ni chungin kum an khar dawn ta tihna a ni.

World ranking hi kum 1993 aṭang khan mumal taka siam ṭan niin, 2019 khan match 1082 zet an khel - ram leh ram inkhel a tam ber kum a ni. Kuminah erawh Covid-19 vangin inkhel a tam lo, match 352 chauh an khel - 1978 hnu lamah kum khata inkhel a tlem ber ṭum a ni hial.

Roberto Martinez-a naute hian match riat an khelh zinga parukah hnehna an chang a, nakkuma khelh tur Nations League Finals atan an tlin bakah, nipui laia khelh tur European Championship atan an tling tawh bawk.

Ranking chhuak tharah hian a sang pali an danglam lo. Pakhatna Belgium hnungah hian world champion ni lai France an awm, Brazil leh England te chuan pathumna leh palina dinhmun an luah chhunzawm bawk.

Cristiano Ronaldo awmna Portugal chuan pangana dinhmun an luah a, Spain leh Agrentina te chuan season hmasa an kharna aiin hma an sawn hret, ram pahnih ve ve an lehpel a ni.

Kumin chhung bikah chuan Hungary chu hmasawn nasa ber an ni. Marco Rossi naute hian ram 12 ngawt an kal kan a, point 44 hmuh belh lehin 40-na dinhmun an luah.

World ranking chhuak tharah hian India chu 104-naah an awm.