Manipur sorkarin Bala Devi leh Bembem-te Police Inspector-ah dah

India hmeichhe footballer zinga European league-a goal khung hmasa ber Bala Devi chu Manipur sorkar chuan police Inspector-ah an kaisantir a; ani bakah hian Indian hmeichhe super star ni ṭhin Oinam Bembem Devi pawh Inspector-ah 

kaisantir a ni.

Manipur Chief Minister N Biren Singh chuan an state-a hmeichhe footballer pahnihte an kaisan thu hi puangin, "Khawvel huapa hmeichhe football-a an hnathawhte avangin Manipuri hmeichhe footballer pahnih Ngangom Bala Devi leh Oinam Bembem Devi-te chu cabinet-in Police department-a Inspector-a kaisantir hi a rem ti a ni," a ti.

Bala Devi hi tunah Scottish club ṭha Rangers-ah khel mekin Indian hmeichhe zinga Europe-a professional football khel hmasa ber a ni a, Pathianni khan Motherwell an hneh ṭumin a vawi khatna atan goal a khung. AIFF Women's Player of the Year-ah kum 2015 leh 2016 khan thlan a ni tawh a, ram tan vawi 58 khelin goal 52 a khung tawh bawk.

Tunah hian police Constable a ni mek a, a football thiam avangin Inspector-ah kaisantir a ni ta a ni. 

Bembem Devi hi mi tam takin Indian hmeichhe footballer ropui bera an ngaih a ni a, 1995-2016 chhung khan India tan goal 35 a khung a, 'Durga of Indian Football'tiin an sawi hial ṭhin. Football khelh a chawlhsan hnuah coaching a luhchilh a, season hmasaa Indian Women's League-ah khan Manipur Police SC coach a ni.