Bayern chhantu Lewandowski

Robert Lewandowski-a'n goal li ngawt khungin striker ropui bik a nihzia a lantir leh a, mahse a team Bayern Munich erawhin Hertha Berlin hneh turin vanneihna an mamawh tel thung.

Pathianni zan Bun-desliga inkhel hmuh-nawmah Bayern hian an mikhual Hertha hi 4-3 in an hneh hram, inhnehtawk tur anga an lan hnuah Bayern hian penalty hmuin Lewy-a'n minute 90+3-ah chakna goal a khung hram a ni.

Bayern Munich khel ṭha tawk lo mah se Poland international Lewan-dowski hna thawh erawh sawi nep theih a ni lo. UEFA Men's Player of the Year 2019-20 hian 40', 51', 85' leh 90'+3-ah te goal a khung.

Mikhual lamin Jhon Cordoba, Matheus Cunha leh Jessic Ngankam te hmangin an chhanglet a, a tawpah erawh chak phu zawk Bayern lamin point thum an hlawh chhuak ta zawk a ni.

Season hmasa khan Hansi Flick-a'n harh-tharna thlenin Bayern hi ropui takin a khelhpui, kuminah erawh beisei angin an la khel chhuak lo. Nikum December thla hnua an chak lohna hmasa ber turin Hoffenheim 4-1 in an ngam lo, tun ṭumah pawh hnehna chang mah se goal thum an chhuah avangin insiamṭhat an mamawh.