Mumbai leh Chennai an chak

Indian Premier League-ah Pathianni zan khan Mumbai Indians leh Chennai Super Kings te hnehna an chang. Mumbai hian Sunrisers Hyderabad 34 runs-in an hneh a, Chennai-in Kings XI Punjab wicket 10-in an hneh ve bawk.

Sharjah Cricket Stadium-ah Mumbai Indians-in vuak hmasak an thlang a, captain Rohi Sharma (6 runs) che ṭha lo mah se Quinton de Kock (67) a che ṭha a; Suryakumar Yadav (27), Ishan Kishan (31), Hardik Pandya (28), Kieron Pollard (25*) leh Krunal Pandya (20*) ten an thlawp ṭhat bawk avangin run 208/5 an siam.

Hyderabad tan captain David Warner-a'n bul ṭan ṭhain ball 44-ah run 60 siam mah se an target a san bakah thlawptu a neih loh avangin run 174/7 chauh an siam a, an chak lo.

Dubai International Stadium-ah Punjab-in bat hmasak an thlang a, Opener KL Rahul (63), Nicholas Pooran (33), Mayank Agarwal (26) leh Mandeep Singh (27) te an che ṭha rual. Kings XI hian run 178/4 an siam a, an target siam hi chakpui theih a ni.

Amaherawhchu Punjab bowler ten Chen-nai tan opener pahnih Shane Watson leh Faf du Plessis te an ngam lo. Watson leh Du Plessis te hian ball 53 ve ve hmachhawnin run 83 leh 87 an siam a, over 17.4-ah Chennai-in wicket chan loin run 181/0 an siam a, hnehna an chang.

Zanin dar 7:30 hian Mumbai Indians leh Rajasthan Royals te an inkhel dawn a, Mumbai tan table chunglama awm chhunzawm turin chak a pawimawh hle.