Liverpool champion kalkawng daltu United?


FA Cup quarterfinal aṭangin Liverpool an pet chhuak phawt a, Premier League-ah Manchester United-in an hmelma team hi an chelh leh ta - Liverpool fans tan United huat ngawih ngawih bak tihtheih a awm rih lo!

Pathianni zan Premier League inkhelah Manchester United leh Liverpool te 2-2 in an inhnehtawk a, Reds tan result pawi tawpkhawk a ni - an chak zawh loh avangin a chung berah Arsenal an awm chhunzawm a, an inkar dangtu erawh goal difference chauh a ni!

Liverpool player-ten Old Trafford-ah an inṭhelhsiak a ni ber a, hun ṭha an neih laia goal khung an harsat chu a tawpah an vanduai phah - point hlawh chhuak tur hian minute 84-naa Mohamed Salah penalty an mamawh zawk hial.

Merseyside club tan Luis Diaz chuan goal hmahruai a khung a, United-in Bruno Fernandes leh Kobbie Mainoo hmangin an chhanglet a, a tawpah Salah 'penalty' hmangin Liverpool an vannei hram.

A tirah Liverpool

United manager Erik ten Hag-a'n, "Liverpool lakah kan thinrim dawn," a ti a, mahse, Old Trafford-a inkhel tir lamah an thinrim lo a ni mai lo a, an duhthalin Liverpool an tal tir a ni ber!

Mahse, Liverpool tlarhmaten an inṭhelh siak a, United fan-te 'ngei mek' keeper Andre Onana a che ṭha bawk. Onana hian Dominik Szoboszlai khung ngei tur nia lang chu ṭha takin a dansak a, Hungarian midfielder hian chance ṭha dang vawi hnih a hlah bawk.

Vanneihnain United lam erawh a ṭang reng bik lo. Minute 23-naah Diaz a inlar a, Darwin Nunez-a ball tauh chu ven loha awm Colombian forward hian tlu chungin goal-ah a khung a, Old Trafford a reh.

"United in si phurh an sut ang em?" tih ai chuan, "Liverpool-in goal eng zat nge an khung belh ang?" tih chu zawhna zawk a ni a, mahse, Reds lamin first half chhunga vawi 15 zet 'shot' nei chungin, United lakah goal an khung belh thei lo.

Hei le United

Liverpool fan-ten chak inring chungin chawlhlawkah hahdamin hun an hmang a, mahse, second half ṭan aṭanga minute ngana lekah Red Devils lamin goal an khung! Liverpool defender Jarell Quansah a chesual a, Virgil van Dijk ball pek a tum chu a pet na tawk lo hret.

Bruno Fernandes chuan ball hi lo lak khalhin, keeper Caoimhin Kelleher-a'n penalty box a chhuahsan lai takin a pet nghal a, goal-ah a lut - goal a ni satliah lo a, he goal hian United player-te tan beiseina thar a siamsak a, fans thawm a ring sawt bawk.

First half-a duhthala United tlarhnung chhaih buaitu Liverpool player-te an talbuai zui a, goal an khung thei lo. Minute 67-naah United thawm bawk a ring nawn a, rawlthar thiam bik Kobbie Mainoo chuan mawi zetin an hmahruaina goal a khung.

Minute 80 thleng pawha Reds-in a chhanletna tur an neih loh avangin United-in chak an inring hman. Mahse, minute 84-naah Aaron Wan-Bissaka chuan ṭul lo lutukin Harvey Elliott a titlu a, penalty a chawi - Salah chuan chiang zetin goal-ah a chantir a, 2-2 a ni.

A pawi zo ta

Liverpool player-ten hun pawimawha an chance neih goal-a an chantir theih loh an tuar a, 62% ball changin, vawi 28 shot an nei a, heng zinga pasarih chu goal zawnah a kal. Mahse, a pawimawh ber goal khung an harsat.

Old Trafford-a a zawna match li goal khung thei Salah-a'n inkhel boruak sangah cool takin penalty chhuih lut mah se, chance dang a hlah nual a, Nunez leh Diaz hi fak ṭhin mah ila, an chance hlah zozai hi a tam hret bawk!

Liverpool fans tam tak chuan Diogo Jota an lam ri a, hliam vanga inlan thei lo Portuguese forward hi finishing-ah na na na chuan a rintlak ṭhin hle. Mahse, a awm lo miau a, Liverpool-in draw result-ah lungawi an zir.

Kum 21 mi centre back Quansah ṭhatzia kan sawi fo a, mahse, game boruak sanga a fimkhur tawk lo erawh a la puitlin tawk lohna pholan saktu a ni - chak chiang tura ngaih Liverpool khan point khat an hawn hram a, champion lo thei dinhmunah an ding mek.