Bayern leh Kane te beiseina neihchhun Champions League

UEFA Champions League quarterfinal chu zanin aṭangin khelh ṭan leh a ni dawn. Bayern Munich-in zanin dar 12:30 hian Emirates Stadium-ah Premier League champion beiseina sang tak nei Arsenal an tlawh dawn. Second leg hi April 17, Nilaini zan hian Allianz Arena-ah khelh leh a ni ang.

German football thununtu tia sawi ṭhin Bayern an tlusawp a, kartina chak reng tura ngaih ṭhin Bavarians hi Bundesliga-ah match zawnin an chak lo. An hmelma Borussia Dortmund chu an mualah an hneh lo a, kartawp khan FC Heidenheim laka 2-0 a hma an hruai hnuaih 3-2 in an inlehthaltir. Bayern tan Bundesliga champion beiseina a tawp a, Harry Kane-a Bavarians tana a season hmasa bera nomawi a duh chuan UCL chiah chu a beisei theih a ni ta.

Tuchel ban a hun!

Thomas Tuchel-a'n season liam ta khan Bayern hi Bundesliga-ah a champion pui a, nomawi an chawi danah inchhuanna tur a awm lo - vanneih vang a ni. Kuminah Harry Kane lalut mah se hma an sawn chuang lo, Bundesliga-ah match ruk ngawt chak loh an nei tawh.

DFL Supercup-ah RB Leipzig 3-0 ngawtin an hneh lo a, DFB Pokal-ah club tenau FC Saarbrucken lakah 2-1 in an tlawm. Tun season hi Bavarians tan mangchhia a ni a, an result a chhiat avangin Tuchel-a'n tun season thleng bak a enkawl dawn tawh lo.

Tunah erawh Bayern legend Lothar Matthaus-a'n season tawp nghah thlen pawh a duh tawh lo a, tuna ban mai a duh tawh. Matthaus chuan, "Dortmund laka result leh Heidenheim laka an khelh dan hian thil tam tak a sawi. Thomas Tuchel hian team a thunun thei tawh lo a, media hmaah thil mak tak tak a sawi ṭhin. Bayern hian siam ṭhat a mamawh a, Tuchel hi mamawh chhanna a ni tawh lo," tiin Chelsea tana Champions League nomawi chawitu manager chu ban a duh thu a sawi.

Tuchel ban theitu Arsenal

Germany lama thuthang awm dan chuan Tuchel tan zanina Arsenal nena an khel tur hi fiahna hnuhnung a ni ang. Emirates Stadium-ah Bayern-in result ṭha an neih loh chuan Tuchel hi ban tura sawi a ni.

Tuchel thlaktu tura hming lang erawh Miroslav Klose a ni a, World Cup-a goal khung theih vanga football khawvelin a hriat lar Klose hi Hermann Gerland-a'n a pui ang. Coach pahnih hi Bayern-in Hansi Flick hnuaia kum 2020-21 season-a an treble champion ṭum khan assistant coach an ni.

German manager Tuchel hian Arsenal lakah record a nei ṭha hran lo. Vawi thum a hmachhawnah vawi khat chauh a chak a, vawi hnih a chak lo. Bayern Munich director Max Eberl chuan, "Player inhliam te an rawn dam ṭan a, mah se tuna kan khelh dan thlir chuan beisei a sang lo. Heidenheim laka kan khelh dan a zahthlak a, Arsenal hneh turin beiseina kan nei tlem," tiin a sawi.

Mahse maw!

Bayern hian Arsenal hi Champions League-ah vawi 12 hmachhawn tawhin vawi sarih an hneh a, vawi thum an chak lo. An intawn hnuhnun ber chu 2016-17 season last 16 kha a ni a, Bayern hian khualmual leh an mualah 5-1 ve vein an hneh a, aggregate-ah 10-2 in an sawp. Hemi hma season-ah pawh hian group khatah an awm hoin 5-1 in an hneh bawk a, match hnuhnung pathumah 5-1 in an chak.

Bavarians hian match pawimawha khel ṭha turin player ṭha an nei a, Harry Kane-a'n Tottenham tana a khelh lai pawhin Arsenal hi a ngam. Serge Gnabry, Thomas Muller leh Jamal Musiala te nen chuan Gunners tan buaina tham an tling dawn.

Chutihrualin Arsenal hi tun hnaiah chuan team ṭha bik an ni a, Premier League match 12-ah vawi khat chiah an khingpuite nen an inhnehtawk a, an chak zawh lohna team hi Manchester City a nih bakah an inkhelhna hmun pawimawh Etihad Stadium a ni.

Arsenal tlarhnung a phui a, William Saliba leh Gabriel te season liam ta aiin an ṭha leh tawh zawk. Tlarhma lamah out and out striker chhuan tur nei lo mah se Buykayo Saka, Kai Havertz, Leandro Trossard, Gabriel Jesus leh Gabriel Martinelli te an kawl a, Mikel Arteta-a'n duh thlan tur player a kawl tiin a sawi theih. Declan Rice leh captain Martin Odegaard te hming lam hmaih a thiang lo bawk.