Real-in City lakah phuba an la thei ang em?

Champions League-a team ropui ber chu Real Madrid an ni a, season liam taa Spanish club lian sawptu chu Manchester City an ni. Zanin dar 12:30 hian Santiago Bernabeu-ah club lian pahnih hi an inhmachhawn dawn a, Carlo Ancelotti hoten phuba lak an tum ang.

Real Madrid hian season liam ta khan Copa del Rey bakah UEFA Super Cup leh FIFA Club World Cup nomawi an chawi. Kuminah La Liga-a champion turin an dinhmun a ṭha a, Supercopa de Espana nomawi chawi tawh bawk mah se UCL nomawi tel lo chuan an lawm a kim lo ang.

Los Blancos hian vawi 14 tehmeuh Champions League nomawi an cbawi tawh a, an record chhuanawm tak hi belhchhah zel an duh. Spanish club tan Jude Bellingham-a'n season ṭha bik a hmang a, inelna hrang hrangah goal 20 khung tawhin club top scorer a ni mek.

Bellingham hi midfielder ni chung siin goal a khung hnem hle. Tlarhmaah Vinícius Junior leh Rodrygo te an awm a, Brazilian duo te chawm turin Toni Kroos, Federico Valverde leh Eduardo Camavinga te an awm. Real hi tunkar tawp khan an awl a, Man City an khelh hun atana inpuahchahna hun ṭha an nei hi dinhmun ṭhaa dah theitu a ni ang.

Chutihrualin Man City hi tun hnaiah club Europe club ṭha ber ang hiala sawi theih an ni a, UCL-a champion lai an nih bakah Premier League-a a zawna vawi thum champion tawh leh chmapion beisei awm zinga mi an ni.

Erling Haaland-a'n season ṭha ber a hmang lo chungin inelna hrang hrangah goal 30 a khung leh der tawh a, UCL-ah phei chuan goal ruk a khung. Man City hian kar liam ta inkhelah Norwegian striker tel lo pawhin ṭha takin an khel thei tih an pholang a, Phil Foden-a'n hattrick a siam. Tunkar tawpah Haaland leh Kevin de Bruyne te goal nen an lo kir a, Crystal Palace chu 4-2 in an hneh.

Carlo Ancelotti pawhin Real Madrid hi team ṭha an ni tih a chiang. Italian manager chuan, "Champion tur chuan team ṭha ber hneh a ṭul. Tun dinhmunah chuan Man City hi Europe-a team ṭha ber an ni ang. A harsa dawn tih kan hria a, mah se champion kan duh chuan kan hneh a ṭul a ni," tiin a sawi.