A hniam ber leh Chelsea inhnehtawk

Premier League mawngphah luahtu Sheffield United leh Chelsea an intawng a, 2-2 in an inhnehtawk. Blues tan a hniam ber laka goal hnih hmun theih loh chu thil zahthlak a tling ngei ang.

Pathianni zan Bramall Lane-a inkhelah, defender Thiago Silva chuan goal hmahruai a khung. Brazil international hian Conor Gallagher-a corner pet chu lei a thlen hmain a lo pet nghal a, goal kilah lutin minute 11-na lekah hma an hruai nghal.

Mahse, chawlhlawk hmain Sheffield United lamin an sut. box sir kil lam angle zim zet aṭangin Jayden Bogle chuan a khung. Blues tana si ban nghaktu Djordje Petrovic khan harsa vak loa a venhim theih ngei tur laiah chiang zetin goal a chhuah.

Second half-ah Chelsea bawk an chefuh hmasa, winger Noni Madueke-a'n box chhungah ball lalutin amah vengtu a paltlang hnuah chiang zetin a khung a, keeper Ivo Grbic tan dan ngaihna a awm lo.

Mauricio Pochettino naute hlimin lawm viau mah se hun tawp dawnah an tlarhnhung a phui lo. An ball tauh chhuah ṭha tawk lo kal zel chu Oli McBurnie chuan hun pek belha si phurh sut nan a khung a, goal dang lut zui tawh loin point khat ve ve an insem.

Chelsea hian kuminah Manchester City an inhnehtawkpui a, kar hmasa mai khan Manchester United chu 4-3 in an hneh, an phur chho dawn ṭan chiah tihah a hniam ber lakah goal hnih an neih hmasak an hum thei lo, hriatthiam an harsa rih hle.

Blues manager Pochettino chuan, "Hun tawp dawna goal kan chhuah dan kha a pawiin a thinrim thlak hle, mahse inkhel pumpui kha kan thlirkir a nih chuan inhnehtawk kha thil inawm pangngai tak niah ka ngai.

"Goal hi chu kan khung thei mai a, kan chhuah ve leh zel hi a buaithlak lai chu a ni. A tawp thlenga theihtawp chhuah kan ngai, chumai bakah huaisen leh phur takin Chelsea tana kan khelh a ngai," tiin a naute chu phur turin a duh.

Sheffield United tan erawh point hlaawh chhuah hrim hrim kha a hlu. Premier League match 31 aṭangin point 16 chauh an la hmu a, la tla fel chiah lo mah se English football inelna sang bera cham zui turin beisei a tlem tawh hle.

The Blades manager Chris Wilder chuan, "Player ṭha tak takte hmaah ka naute khan ṭha takin an khel a ni. Min ṭantute hian inkhel hmuhnawm en an phu a, chumi tur chuan stadium an rawn pan ṭhin, tun ṭumah khan an duh ang chu kan hmuhtirin ka hria," a ti.