Aizawlah Trau an inkhel ngam lo

AIFF ruahman dan chuan zanin dar 7:00 hi RG Stadium, Mualpuia Aizawl FC leh Trau inkhelh hun tur a ni. Amaherawhchu Manipur club Trau hian Aizawla rawn zin an hreh a, zaninah I League inkhel en tur a awm dawn lo.

Aizawl FC manager F. Lalrinmawia chuan, "Trau hi an rawn zin lo a, I League match a awm dawn lo. AIFF lam chuan neutral ground-a khelh an rawn rawt a; Guwahati emaw Shillong emaw Kolkata emawa inkhel turin ruahmanna an siam. Hei hi kan remti lo a nih pawhin point khat ve ve insem turin an rawn ngen. Mahse, keini chuan kan pawm lo ve ve. Aizawl a ral muang a, an rawn kal duh lo a nih chuan point thum kan hmu mai turah ka ngai," tiin Vanglaini a hrilh.

Mizo club hian Trau leh Neroca te a la hmachhawn dawn a, Manipur club pahnih hi an inthurual avangin match hnuhnung zawk pawh hi ṭhulh thei dinhmunah a ding.