Palinaah Spurs an awm

Tottenham Hotspur tan season thara Champions League khelh leh khelh loh chu an kuta awm a ni ta. Spurs hian Nottingham Forest chu 3-1 a hnehin Premier League table-ah palina dinhmun an luah.

Forest defender Murillo-a'n minute 15-naah Timo Werner-a cross chu anmahni lamah a ti lut a, chawlhlawk hmain Chris Wood chuan a sut - a siamsaktu chu Anthony Elanga a ni.

Inkhel chawhnu lamah Ange Postecoglou-a nauten a ṭha zawk an nihna a takin an lantir. Defender Micky van de Ven leh Pedro Porro ten goal an khung belh a, an duh leh mamawh ang takin point thum an hlawh chhuak.

Spurs hian an elpui Aston Villa point neih zat (60 points) an nei ve ta chiah a, mahse an goal difference a ṭhat zawk avangin palina an ni. Unai Emery naute aiin North London club hi match khatin an la khel tlem zawk bawk a ni.

Tottenham manager Postecoglou chuan, "Kan khel ṭha hle, goal thum kan khung a ni satliah lo, inkhel kan thunun hneh hle kha a pawimawh. First half tawp lamah khan tlemin kan talbuai ve ṭep, khatiang thil erawh kha chu inkhelah chuan a thlen ve ṭhin," a ti.

Midfielder James Maddison chuan Ryan Yates lakah kut a thawh niin a lang a, mahse hnawhchhuah a ni lo. He thil thleng hi Postecoglou-a'n tih luih nia a hriat loh thu a sawi laiin Forest manager Nuno Espirito Santo erawhin Maddison chu hnawhchhuah ngei tur nia a hriat thu a sawi ve thung.