Goal ruk chhuahtu Ajax an mualpho

Season duhawm lo tak hmangtu Ajax mualphona belhchhahin a awm zel a, Pathianni zan khan Dutch league-ah Feyenoord chuan 6-0 ngawtin an sawp - De Klassieker tia hminglem an pek hial inkhelah Ajax an mualpho.

Champion lai Feyenoord tan Igor Paixão leh Yankuba Minteh ten goal hnih ve ve an khung a, David Hancko leh Quinten Timber ten goal khat ve ve khung bawkin, 6-0 in mualneitu Feyenoord an chak a, Ajax an hawihai.

Feyenoord hian vawi 30 ngawt 'shot' an neih laiin, Ajax hian vawi khat chiah an nei ve thung - He inkhelah hian thlasik laia Ajax zawmtu Jordan Henderson chu hliam vangin a inlan ve thei lo a ni.

Ajax boss John van't Schip chuan, "Chawlhlawkah khan huaisen taka inkhel turin kan infuih a, mahse, kan duh angin thil a thleng lo. Puitling leh naupang inkhel ang chauh a ni," a ti a, chhuanlam a zawng lo.

Player a nih laia Ajax tana khel ṭhin John van 't Schip chuan, "Kawng tinrengah kan phak lo a ni ber. Tharumah kan ngam lo a, ball kangah kan hneh lo a, mimal tihsual avangin goal li kan chhuah a, Feyenoord-in min nawr nat vang a ni.

"A zahthlak tih mai hian a sawifiah zo lo a, player chauh pawh a ni bik lo, kan vaiiin, staff-te thlengin kan mualpho hle a ni," a ti - Ajax hi tun hmain Feyenoord lakah an lo mualpho tawh a, mahse, khuarei an chang tawh.

Kum 1960 khan 6-1 in an ngam lo a, 1964 khan 9-4 in Feyenoord lakah an tlawm tawh bawk. Club chanchina an tlawm chian ber erawh kum 1913 khan a ni daih tawh a, Dordrecht lakah 9-1 in an tlawm.

Dutch league-ah PSV Eindhoven chuan point 78 hmuin hma an hruai mek a, an hnuai chiaha awm Feyenoord aia an sanna chu point kua lai a ni. Vawi 36 ngawt Dutch champion ni tawh Ajax hi parukna niin, point 33 ngawtin hmahruaitu PSV an phak lo a, Champions League khel phak chin top three an hlatna chu point 15 lai a la ni!