Bengaluru beiseina tihtawpin a awm

Indian Super League-a Bengaluru-in playoff khelh an beiseina chu a thamral a, Pathianni zan khan East Bengal lakah 2-1 a an tlawm avangin playoff an khel dawn lo tih a chiang tawh.

Kolkata club tan Saul Crespo chuan goal hmahruai khungin, mikhual team Bengaluru tan Sunil Chhetri chuan si phurh a sut. Mahse, Brazilian forward Cleiton Silva-a'n a club hlui lakah khung ve lehin, 2-1 in East Bengal an chak.

East Bengal tan playoff khelh beiseina a la nung zel a, mahse, league match khat chauh khelh tur an neih tawh avangin midang result-ah an innghat tawh thung.

ISL-ah league hmahruaitu leh pahnihna te chu playoff semifinal khel turin an tling nghal ṭhin a, pathumna aṭanga paruknain playoff knockout an khel thung - team pali hi playoff knockout-ah intawngin, a chak zawk pahnihin semifinal-ah table-a pakhatna leh pahnihna an zawm ve leh ṭhin thung.

Mumbai City, Mohun Bagan SG, FC Goa, Odisha FC leh Kerala Blasters te chu ISL playoff khel tura tling chiang tawh an ni a, hmun ruak pakhat a la awm - East Bengal, Chennaiyin leh NorthEast United ten hmun ruak pakhat hi an la beisei vek.

Pathianni zan ISL inkhelah East Bengal tan Lalchungnunga chu bench aṭanga luhtir a ni a, Bengaluru tan rawlthar ṭhangduang Lalremtluanga Fanai chuan inkhel bul a ṭan bawk.