Juve an chak ve leh ta

Serie A match li chhung chak ni hmel an hmuh loh hnuah Juventus an chak ve leh ta. Old Lady hian Pathianni zan inkhelah an mikhual Fiorentina chu 1-0 in an hneh a, champion beisei ngam tawh chiah lo mah se palina ni phak turin an dinhmun an siamṭha.

Allianz Stadium-a inkhelah Juventus tan defender Federico Gatti chuan goal awmchhun a khung. Minute 21-naah corner aṭanga ball kal goal ban an tauh per kir leh lam chu chang fuhin a khung a, point thum hlawhchhuah nan a tawk.

Juve manager Massimiliano Allegri chuan, "Player tinten kan theihna chintawk an hre vek a, chumim mil chuan kan khel chhuak thei tawh. Fiorentina lakah goal thum kan khung a, mahse pahnih chu hnawlsak kan ni, goal khat chauh pawm ni mah se kan khel ṭha tawk tih a lang," a ti.

Old Lady hian Serie A match 31 aṭangin point 62 an hmu a, an chunga awm pahnihna AC Milan an phak lohna chu point ruk a ni a, pangana AS Roma aiin point sarihin an sang zawk - season thar atan UCL ticket an nei hnai ta hle.

Nizan khan hmahruaitu Inter Milan an inlan a, result kan hre hman lo - Inter hi an chak a nih chuan Milan aiin point 14 ngawtin an fal leh dawn, an kut dinglamin Serie A nomawi an khawih phak tawh a ni.