Japan ramah Verstappen a chak ber

Formula 1 champion lai Max Verstappen chuan kawng dik a zawh leh thei ta. Pathiannia tlan zawh tak Japanese Formula One Grand Prix-ah Red Bull driver hi a chak ber a, championship hmahruaitu a nihna a sawhnghet.

Intlansiak hnuhnung zawkah khan khawl lam chiang lo vangin Verstappen hi a tlan tluan thei lo. Suzuka tlankawngah erawh a ṭhat dan takin a tlan leh thei tawh a, team dang tan umphak rual loha chakin a tlan thleng.

Melbourne khawpuia a chet fuh lohna kha Verstappen tan a lungchhiatthlak ngei ang, kum 2022 hnua F1 intlansiak a tlan tluan theih loh hmasak ber a ni hial, tun ṭumah erawh Red Bull an che fuh - Max hnungah hian a teammate Sergio Perez a thleng bawk.

Dutch tlangval Verstappen chuan, "Vanduaina tawh hnua intlansiak lehna hmasa berah chuan hlauhthawn pawh a na duh angreng hle. A nihna takah chuan a tir aṭang khan rilru a nuam lo, a chanve hnu lamah erawh kha chuan ngai ka awh leh tawh," a ti.

Japanese Grands Prix-ah hian a zawnin vawi thum hnehna a chang tling ta chiah, vawi sarih world champion ni thei Michael Schumacher leh Verstappen te chiah hi Suzuka tlankawnga vawi thum chak zawn thei an ni hial.

Mercedes driver Lewis Hamilton tan hun ṭha a herchhuak thei rih lo. Season thara Ferrari zawm tur Hamilton hi pakuanaah a thleng a, champion hnem lama Schumacher khum a tumna chu kuminah chuan a la hlawhtling dawn rih lo niin a ngaih theih.

Car intlansiakna sang ber hi Asia khawmualpuiah an tlan chhunzawm dawn. April 21, Pathianni chawhnu dar 12:30 hian Shanghai International Circuit-ah Chinese Grand Prix an tlan leh ang.