Old firm derby-ah goal ruk a lut

Scottish Premiership pawh a ngaihnawm zel - Pathianni zan khan old firm derby-ah Rangers leh Celtic intawngin, 3-3 in an inhnehtawk a, chak zawk awm loin an inṭhen a, champion tur sawi a la harsa hle.

Rangers khelmualah Celtic-in goal an khung hma a, second 21-na lekah Rangers captain James Tavernier chuan Celtic winger Daizen Maeda a pet per a, keeper Jack Butland a inring hman lo - goal-ah a lut.

Brendan Rodgers hoa champion leh tum Celtic-in inkhel an thunun zui a, Connor Goldson handball vanga an penalty hmuh chu Matt O'Riley chuan goal-ah a chantir - minute 34-na a ni a, goal dang lut loin chawlhlawk an hmang.

Second half-ah Philippe Clement enkawl Rangers an insiamṭha. Tavernier-a penalty leh Abdallah Sima goal hmangin si phurh an sut zo a, bench aṭanga luhtir Sima-a'n goal a khung hian minute 86-na a nih tawh avangin 2-2 a inkhel a tawp mai a rinawm hman.

Mahse, minute khat a liam hman chauh tihin Adam Idah chuan Celtic goal thumna a khung zui. Hetah hian a la tawp lo cheu! Hun pek belh minute thumnaah Rangers winger Rabbi Matondo chuan mawi lutukin goal a khung leh a, 3-3 in inkhel a tawp zui.

Scottish Premiership-ah Celtic-in point 75 neiin hma an hruai a, an hnuai chiaha awm Rangers hian point khat chiaha phak loin, match khatin an khel tlem zawk bawk - Celtic-in match ruk bak khelh tur an nei tawh lo a, Rangers-in match sarih an la nei. A ngaihnawm chho zel dawn.