Juventus leh Napoli inkhel lo!

Serie A champion Juventus chu inkhel turin Allianz Stadium chhungah lut mah se an khingpui tur Napoli an inlan lo a, hmachhawn tur an neih loh avangin Andre Pirlo naute hi inkhel loin an kir leh.

Pathianni zan dar 12:15 kha match khelh hun pangngai a ni a, inkhelh hun hma darkar khat la awmah Old Lady chu an hmunah an thleng. Mahse, coronavirus vanga buaina tawk Napoli an inlan thei lo.

Kar hmasa khan Napoli player pahnih chuan hri leng an kai tih hriat chhuah a ni a, team player dang pawh khung hran an ngai. Buaina karah Serie A thuneitu lam chuan match an kaltlang pui tur thu an sawi a, inkhel tura Juve an inlan hi an tih tur diktak a ni.

Napoli erawhin Naples Health Authority (ASL) lamin inkaih-hruaina dan leh hrai an siam an zawm a ngaih thu an sawi. Serie A dan leh hrai ang chuan team inlan lo hi 3-0 a chak loah puan tur a ni thung, tun ṭuma thil thleng erawh a boruak a danglam.

Nimin tlai thleng kha chuan Juve leh Napoli inkhel tur hi 'a hun sawn' tih bakin thu thar a la awm lo. Serie A thu-neitu lamin Juventus hi point thum pe ngawt bik loin an inkhelh theih hun an ngaihtuahsak dawn a nih hmel.

Juventus president Andrea Agnelli chuan, "Keini lam chuan dan leh hrai kan zawm mai, zawm lo ni ila chuan hremna tawk thei kan ni a, hrem kan nih loh pawhin insawifiah a ngai thei," tiin a sawi.

Champion Juve an inkhelh theih loh lai hian season hmasa pahnihna Inter Milan erawh an inkhel thei. Antonio Conte naute hi an mikhualna ramah Lazio nen 1-1 in an inhnehtawk a, season bul ṭan fuh tak AC Milan chuan an mikhual Spezia chu 3-0 in an sawp ve bawk.