Aston Villa 7 - 2 Liverpool Kan dah khat ngam rih lo, Villa lamin an khung belh takin!

Goal sarih chu tam tak a ni - chuti zat goal chu Aston Villa-in Liverpool laka an khung zat a ni. 'Football-ah thleng thei lo a awm lo,' tih thu dikna chu a takin an nemnghet. 

Tottenham Hotspur-in Man-chester United an sawp avanga Liverpool fan-ten United fan-te an nuih zatna chil per pawh a hul fel hmain Reds-in goal sarih an chhuah a, Aston Villa lakah 7-2 in an tlawm.

Tun season a Chelsea leh Arsenal hneh tawhtu Liverpool chu Premier League kai thar hlim club ang maiin an khel a, Villa zawk hi 7-2 a tlawm ni se khawvelin mak a ti lo ang. 

Mahse, season hmasaa point 18 laia sang fal chunga league champion ni thei khan Premier League a inhamtang hram hram team an ngam ngang lo a, tih mualphoin an awm. 

Aston Villa player-te khelh ṭhatna leh inpeknain fak phu viau mah se an sawp tak team hi Liverpool an ni miau a, Jurgen Klopp-a naute chanchin hi inkhelh zawh thleng pawha sawi zui hlawh zawk chu a ni. 

Liverpool tan an thiampuipa Sadio Mane chu Covid-19 kai vangin a inlan thei lo a, inkhelh hma lawkin goalkeeper ṭha mi Alisson inhliam thu an hre bawk - Brazilian goalkeeper thachhang dawltu Adrian hi keeper 'naran' tak a ni a, Reds fan-te tan thlamuan a harsa. 

Villa Park-ah mualneitu team-in goal khung turin an nghah rei a ngai lo a, Adrian tihsual nangchingin Ollie Watkins chuan minute lina lekah goal hmasa ber a khung - Adrian ball pek dawng hman lo Joe Gomez chu dem theih a ni bawk. 

Watkins hian minute 22-na leh 39-naah a khung bawk a, season hmasa Championship lama Brentford tana khel striker goal khung karah hian John McGinn chuan a khung ve bawk. 

Liverpool tan Mohamed Salah chuan goal hnih a khung a, a goal hmasa zawk minute 33-naa a khung hian 2-1 in an hnufual chiah - beisei tur a la awm. 

Mahse, Reds an phur tak tak hmain McGinn-a'n goal khat a rawn khung a, 4-1 in first half a tawp. Liverpool player-te quality enin beisei bo erawh a la ni lo a, chawlhlawka fuih phur tura Jurgen Klopp an neih bawk avangin Reds fan-ten beisei an la nei. 

Second half ṭan a ni a, Liverpool fan-te beisei ang a thleng lo. Khelmuala hun a hman chhung zawnga tal na Ross Barkley chuan minute 55-naah an goal ngana a khung a, Salah-a'n minute 60-naah 5-2 ni turin a khung ve leh nghal. 

Mahse, Villa an phur lakawh - assist vawi thum ngawt nei tawh Jack Grealish chuan goal khungtu zinga a hming nem kai ve a phu tih inhriain goal hnih a rawn khung a, 7-2 in an chak - Liverpool an mualpho thung. 

Champion team an ni a, goal sarih ngawt an chhuah bawk - hetichunga Liverpool vanneih thu sawi a ngai hian an khelh chhiatzia a hrilhfiah a, Villa lakah an zawr tih a nemnghet. 

Pound maktaduai 28 man Watkins-a'n Adrian chauh hmachhawn chunga a khung loh leh bar a tih perte kha uiawm tak vek an ni a, kha goal kha lut ngat se Liverpool mualphona belhchhahin a awm ang. 

Liverpool-in Jordan Henderson an mamawhzia a lang nawn a, 'high defensive line' a khel ṭhin team hian Hendo awm loin a kar awl hnawhkhattu an nei lo a, hruaitu an nei lo bawk - Villa-in 'awl' an hmuh an hmang ṭangkai thiam tih a lang. 

Mane aia lut Diogo Jota-a'n khel ṭha pangngai mah se Senegalese forward hmun ruak em chu a hnawh khat zo lo tih a lang a, Covid-19 vanga inkhunghrang mek Thiago Alcântara awm se game result a danglam thei bawk - Liverpool-in first team player pali an chhawr thei lo a, chhuanlam tling ni mah se goal sarih chhuah thup mawi nan erawh a tling tawk lo. 

Premier League champion nichungin Villa an lenchilh a, goal sarih ngawt an chhuah avangin Jurgen Klopp a lawm lo a nih pawhin a awm lo hran lo. 

German coach chuan, "Thawn-thu ziah danglam kan duh thu kan sawi ṭhin a, zanin result hi thawnthu hriat reng tawh tur chu a ni - mahse kan duhdan erawh a ni lo. Kan chance neih kan chhawr lo a, mahse goal sarih kan chhuah miau avangin 7-7 ni tura beisei chi erawh a ni lo. 

"Tihsual kan ngah em em a, kan tihsual a pawi em em zel bawk. Kan goal hmasa ber aṭangin kan tisual nghal a, goal bulah kan talbuai em em. 1-0 a nih hnu khan kan bo a ni ber a, tho leh thei ni mah ila invenhim lam kan ngaihthah tlat a ni," a ti a, an chak loh a pawm.

Liverpool hian October 17 tlaiah season hmang ṭha tak Everton an lenchilh zui dawn a, Klopp chuan an goalkeeper Alisson chuan Merseyside derby a khelh theih loh tur thu a sawi - a dam hun tur he thu buatsaih lai hian sawi lawk theih a ni lo. 

Villa-in an muala league champion lai an tum vawi 18-naah hnehna an chang ve leh ta a, champion lai an hneh hnuhnun ber chu December 1998 kha niin Arsenal chu 3-2 in an ngam. 

Aston Villa boss Dean Smith chuan, "Hetiang result neih theih hi kan beisei lo hrim hrim. Inkhel ham rik a rik aṭanga a tawp thlengin kan khel ṭha a, team ṭha bik leh tlarhnung khawng ṭha em em lakah chance kan insiam ṭeuh thei a ni," a ti a, a lawm hle. 

Villa hian league match thum an khelh tawhah hnehna an la chang vek a, September 17 zan dar 7:30-ah team ṭha Leicester City an lenchilh zui dawn avangin Liverpool an sawp hi inrintawkna neih nan a ṭangkai khawp ang. 

Liverpool-in April 1963 khan Tottenham lakah goal sarih ngawt chhuahin 7-2 in an lo tlawm tawh a, Villa laka an tlawm hi hemi hnua inelna hrang hranga goal sarih an chhuah leh hmasa ber a ni a, Villa-in February 1995 a Wimbledon 7-1 a an sawp hnua Premier League match a goal an khung leh hnem ber a ni thung. 

•    September 1953 a Arsenal-in Sunderland laka goal sarih an chhuah hnuah tun hi league champion laiin match khata goal sarih an chhuah leh hmasak ber a ni. 

•    Liverpool-in tun season league match li an khelh tawhah goal 11 an chhuah a, 1937-38 season hnua an league match hmasa palia goal an chhuah hnem ber record an siam. 

•    October 2007 hnua a vawi khat nan Aston Villa-in an muala Premier League match li an khelhah a zawnin hnehna an chang. 

•    Season hmasa ṭantir aṭanga chhiar telin English top four league-ah Ollie Watkins (29 goals, playoff chhiar tel) aia goal khung hnem an awm lo. 

•    Watkins kha Premier League a Liverpool laka hattrick siam thei 10-na a ni a, September 2010 a Dimitar Berbatov hnua Liverpool laka hattrick siam thei hmasa ber a ni bawk. 

•    Pathianni zana Liverpool tana khel James Milner-a'n Villa tana a khelh laiin February 2010 khan Burnley lakah assist vawi thum a nei a, Milner hnua Villa player zinga Premier League a assist vawi thum nei leh thei hmasa ber chu Jack Grealish a ni. 

•    Mohamed Salah-a'n Liverpool tana Premier League a team 26 a hmachhawn tawha 25 lakah goal (96%) a khung a, Premier League ah Liverpool tan ani aia record nei ṭha an awm lo.