Khawsik chunga khel Zverev a tla

Alexander Zverev chuan French Open aṭanga a tlak hnuah a dinhmun a sawi chiang, khawsik leh thawk lama harsatna nei chungin match a khelh thu a sawi - coronavirus erawh a kai lo nia sawi a ni thung.

Pathianni zan last 16 inkhelah Zverev hi rawlthar Jannik Sinner lakah 6-3, 6-3, 4-6, 6-3 in a chak lo, season dang ang bawkin German star hian Grand Slam huangah beisei a phak lo chhunzawm.

US Open finalist Zverev chuan, "Ka khua a sik a, thawk a harsa hle bawk. Ka ṭawng ri aṭang pawh hian ka nuam lo tih chu in hre thei ang, a nihna takah chuan inkhel loa inhnukdawk zawk tur ka ni," tiin a sawi.

Kum 23 mi Zverev hi Paris khawpuia a luh hma leh a thlen hnuah Covid-19 a kai em tih endik a ni tawh a, hrileng a kai lo. Mahse endik a tawh hnuhnung ber hi September 29 kha a nih tawh avangin a hnu lama kai thei dinhmunah chuan a ding.

French Tennis Federation (FFT) chuan, "Inkhelh hma khan tournament doctor a be rawn hmasa lo. Endik a nih hnuhnung ber aṭanga ni nga hnuah match a khel leh chiah a, kalphung pangngaiah chuan endik a hun leh chiah tihna a ni," an ti.

Zverev a tlak laiin a ṭhianpa Dominic Thiem erawhin harsa takin hnehna a chang. US Open champion hian wildcard hmanga inlan Hugo Gaston chu 6-4, 6-4, 5-7, 3-6, 6-3 in a hneh hram - tualchhung tlangval Gaston hian Stan Wawrinka a hneh hnuah khel ṭha viau mah se a vannei nawn ta lo.

Austrian star Thiem chuan, "Kan khel ṭha ve ve, hetiang taka player inpe zo ka hmachhawn lohna hi a rei tawh. Match atan a inpumpek a, a bik takin a drop shot te kha a ṭha chungchuang hle," a ti. Thiem hian winners vawi 59 nei mah se unforced errors ṭum 63 zet a nei, round sang zawkah chuan tihsual neih tlem a ngai ang.