Zanin dar 12:30-ah UCL Quarterfinal : PSG Vs Barcelona; Atletico Madrid vs Dortmund

UEFA Champions League quarterfinal chu zaninah khelh chhunzawm a ni dawn. Paris Saint-Germain-in zanin dar 12:30 hian Parc des Princes-ah Barcelona an mikhual ang a, Atletico Madrid-in Metropolitano Stadium-ah Borussia Dortmund an mikhual bawk ang.

PSG leh Atletico Madrid te hi la champion ngai lo an ni a, an khingpui tur Barcelona leh Borussia Dortmund te erawh champion tawh ve ve an ni thung. Europe club ṭha tak vek ni mah se tun dinhmunah chuan nizana quarterfinal khelte ai chuan an buk a rit lo zawk.

Enrique leh Mbappe

PSG leh Barcelona inkhel chanchin sawi apiangin kum 2017-a thil thleng sawi nawn a ṭul leh ṭhin. French champion hian an mualah 4-0 ngawtin hneh mah se mah se Barca-in Lionel Messi hoin La Remontada (comeback) ropui bik an thlentir a, 6-1 in Nou Camp-ah an chak.

2020/21 season-ah team pahnih hi last 16-ah an inhmachhawn leh a, Nou Camp-ah Messi hmangin Barca-in khung hmasa mah se PSG-in Mbappe hattrick hmangin 4-1 in an lehthal. Parc des Princes-ah thilmak a thleng nawn lo, 1-1 in an inhnehtawk a, PSG-in hnehna an chang.

PSG-in UCL nomawi duhin Neymar an lakluh hnuah Messi an la lut leh a; mak ang reng tak erawh player ṭha bik pathum Messi, Neymar leh Mbappe te an kawl chungin season hnih chhung chu last 16-ah an tla.

Tunah erawh tactician ropui Luis Enrique an kawl a, Neymar leh Messi awm loh an tuar lo. Ligue 1-ah an champion ngei dawn niin a lang tawh a, Trophée des Champions-a nomawi an chawi tawh bakah Coupe de France-ah final an lut.

Enrique chuan, "Nomawi pali kan chawi thei a nih chuan Mbappe hi a la cham ve thei a ni," tiin a sawi a, PSG hi nomawi pali chawi thei an nih avangin Spanish manager thusawi hi a thleng thei a ni. Chutihrualin season tharah erawh Mbappe hian Real Madrid kawr a hak a rinawm tawh zawk.

Mbappe hian Madrid a pan hma ngeiin PSG hi Champions League nomawi chawipui a duh ang. French forward chuan, "Barca hmachhawn turin ka inpeih a, kan theihna zawng zawng nen kan khel dawn. Kan theihna bak chu Pathian kutah a awm," tiin a sawi.

Kum 25 mi Mbappe hian tun season-a inelna hrang hrangah match 40 aṭangin goal 39 a khung tawh a, Barca tan ven uluk a ṭul dawn. Chutihrualin PSG hi Mbappe ringawtah an innghat lo. Tlarhmaah Gonçalo Ramos leh Randal Kolo Muani te an awm a, rawlthar hmabak nei êng Warren Zaïre-Emery te an awm bawk avangin an tawh a khirh khawp ang.

Barca lam ve thung

PSG-in Achraf Hakimi an chhawr thei dawn lo a, Barca tan chanchin lawmawm a ni. Xavi hote hian match 11 chhung hneh loh an tawng tawh lo a, La Liga-a an match hnuhnung pangaah goal an chhuah lo, player inhliamte an rawn chho leh ta bawk.

Andreas Christensen chu inkhel turin a inpeih hman a rinawm a, Frenkie de Jong pawh a dam hnai a, second leg-ah chuan Pedri pawh a inpeih tawh a rinawm. Chutihrualin kum 17 mi Pau Cubarsi hming hi chhinchiah a ṭul, Ronald Araújo nen inkawpin tlarhnung a phui ṭhin hle.

Tlarhmaah Robert Lewandowski an kawl tih hriat a ṭha a, kum 16 mi Lamine Yamal hi a tikimtu a ni ringawt lo - a thiam berte zinga mi a ni. Midfield-ah İlkay Gundoğan a pawimawh a, goalkeeper Marc-André ter Stegen an neih bawk avangin PSG el pha thei tur an ni.

Atletico Vs Dortmund

Atletico Madrid hian Diego Simeone hnuaiah UCL match 100 an khel tling tawh a, Argentine manager hnuaiah vawi 49 zet UCL-ah an chak tawh. Manager pariat chiah UCL-a vawi 50 chak thei an awm a, Atletico-in Dortmund an hneh theih chuan UCL-a vawi 50 chak thei huangah an awm dawn.

Mahse, Dortmund hi zuam ngawt a rem lo. German club hian UCL match hnuhnung pasarihah (W4 D3) hneh loh an tawng lo. Dortmund hi an muala match hnuhnung 20 an khelhah vawi hnih chauh an chak lo a, first leg-a mahni muala khel tur Atletico tan an mual Estadio Metropolitano-a hnehna an chan hi a pawimawh hle.