Lunglei District-a inkhelh thiam ber Ramthar

Lunglei DFA leh Lunglei District High Powered Committee (HPC) te buatsaih - 13th HPC Cup 2024 final hmuhnawm takah Ramthar chuan Lalthanzuala (TZ-a) goal li hmangin Zobawk South 4-3 a hnehin an champion. Hmeichhe inelnaah Theiriat chuan Vanhne 6-1 a hnehin an champion ve bawk.

Ṭhuamluaia mual khat tlat entu an pung khawm a, Ramthar leh Zobawk South ten football hmuhnawm an chhawp. Zobawkin ke ve lama ball pet thiam TS Zadeng hmangin minute riatna lekah an khung hmasa. Mahse, LPS Cup-a Vaivakawn tana hming chhertu TZ-a'n minute 15 chhung hattrick a siam a, minute 30 a nih meuh chuan 3-1 in Ramtharin hma an hruai ta zawk.

Zobawk an beidawng lo a, R. Lalbpeksanga (34') hmanga first half-a siphurh an sut ṭhen hnuah Lalchawimawia hmangin minute 55-naah siphurh an sut zo. Inkhel boruak a sang a, chak tur hriatthiam a har. Minute 82-naah vei lam aṭanga ball vawrhluh chu TZ-a'n tauh lut.

National Football C'ship-a Mizoram hmeichhe team semifinal hruai thlengtu coach Lalrozara chuan, "Lunglei tualchhung player-ah chuan tun dinhmunah TZ-a a ṭha ber," tiin Vanglaini a lo hril tawh a, HPC Cup final-ah a dikna a lang. TZ-a hian goal riat khungin top scorer a ni.