India tan Remsiami leh Marina-i

Hockey India chuan player a koh chhin aṭangin a zatve vel a thlifim leh a, heng zingah hian Mizo nula Lalremsiami Hmar leh Marina Lalramnghaki te an tel chhunzawm zel, inelna pawimawh an hmachhawn dawn.

India rama hockey thuneitu sang ber Hockey India hian a tirah chuan senior camp zawm turin player 60 a ko a, heng zingah hian Mizo panga - Lalhlunmawii, Lalruatfeli, Marina Lalramnghaki, Lalrindiki leh Lalremsiami te koh an ni.

SAI Center, Bengaluru-ah April 2-7 chhung khan training an nei a, chumi hnuah player 30 hi thlan chhuah leh an ni. Tuna player thlan bikte hian May 22 aṭanga khelh tur FIH Hockey Pro League an hmachhawn ang.

India hmeiche hockey team hi Belgium khawpui pakhat Antwerp leh United Kingdom khawpui London-ah te an zin chhuak dawn a, chumi hma chuan May 22 thleng training an nei chhunzawm dawn a ni.

FIH Hockey Pro League-ah hian Argentina, Belgium, Germany leh Great Britain te an hmachhawn dawn, khawvel huap pawha team ṭha ber berte an nih hlawm avangin inelna a hautak dawn tih a chiang.

India hmeichhe hockey team sawi apiangin Mizo hming a lang deuh zel. Remsiami chu player pawimawh berte zinga mi a ni ṭhin a, tunah chuan senior team-ah Marina-i a awm belh a, player dang pawhin remchang an la hmu ve lehin a rinawm.

Hockey National Championship 2024-ah khan Hockey Mizoram chuan team a tir a, champion chiah lo mah se pool match an paltlang avangin National Games khel turin an tling. Mizoram aiawha chhuakte kha Thenzawl Hockey Training Center aṭanga inzir chhuak vekte an ni.

India Squad:

Goalkeepers: Savita Punia, Bichu Devi Kharibam, Bansari Solanki, Madhuri Kindo.

Defenders: Nikki Pradhan, Udita, Ishika Chaudhary, Monika, Ropni Kumari, Mahima Chaudhary, Jyoti Chhatri, Preeti.

Midfielders: Salima Tete, Marina Lalramnghaki, Vaishnavi Phalke, Neha, Jyoti, Edula Jyoti, Baljeet Kaur, Manisha Chauhan, Akshata Abaso Dhekale, Ajmina Kujur, Nisha.

Forwards: Mumtaz Khan, Lalremsiami, Sangita Kumari, Deepika, Sharmila Devi, Navneet Kaur, Deepika Soreng, Preeti Dubey, Vandana Katariya, Rutuja Dadaso Pisal.