Mizo tlangval Lallianzuala Chhangte a ropui zel

Season hmasa ISL-a player ṭha ber atana thlan chu Lallianzuala Chhangte a ni a, Indian player zinga hetiang dinhmun luah thei pahnihna a ni - Lunglei tlangval hian league match 22-ah goal 10 khungin, assist vawi ruk a nei a, league round chu table chung ber luah chungin an khar bawk.

Lianzuala chungah beiseina a sang a, tun season-ah beisei angin season bul a ṭan lo. Mahse, Mumbai City forward hian a rilru paukhauhzia pholangin, "Season hmasa phak leh ngei ka tum a, hun pawimawhah team tan goal pawimawh khung zel ka tum ang," tiin Vanglaini a hrilh.

AIFF Player of the Year hian a thusawi hlen turin kawng dik a zawh zel . Thawhṭanni zan khan Odisha lakah goal leh assist a nei a, Mumbai City chu 2-1 in hnehna a chanpui. Mumbai tan hian Jorge Pereyra Diaz chuan minute 22-naah goal hmahruai a khung a, Lza siamsak a ni.

Lunglei tlangval hian duhthala Odisha tlarhnung a chaih phar hnuah Jorge Díaz tan a siamsak a, Argentine striker tan goal-a chantir mai loh chu tihtur dang a awm tawh chuang lo.

Mahse, Odisha an beidawng bik lo. Goal an chhuah aṭanga minute thum hnu lawkah Mumbai goalkeeper Phurba Lachenpa a chesual a, Odisha striker Diego Mauricio ke bulah tak ball a pe - Flamengo forward hlui hian goal kilah nalh zetin a khung zui a, 1-1 a ni.

Goal dang lut loin chawlhlawk hman a ni a, minute 61-naah 'Mizo Flash' Lianzuala a inlar - Odisha tlarhnung buai nuai karah Diaz-a chance neih, Odisha keeper Amrinder Singh-a dan per chu hnai tak aṭangin goal-ah a khung a, 2-1 in Mumbai an chak zui.

Mumbai tan Lza a pawimawh chhunzawm zel a, tun season-ah league match 21 khela goal ruk khungin, assist vawi ruk a nei ta. Mumbai tan league match 50 a khelhna chiah niin, goal 16 a khungsak tawh.

Lza hian ISL hrim hrimah match 140 khel tawhin, goal 36 a khung a, assist vawi 18 a nei. ISL chanchina goal khung tam lamah parukna niin, assist ngah pasarihna a ni phak bawk.

ISL chanchina goal khung tam lamah Indian player zinga a tluk loh awmchhun chu Sunil Chhetri (61 goals) a ni a, assist ngah lamah Brandon Fernandes (25 assists) leh Jerry Mawihmingthanga (20) te a tluk lo bawk. Zanin dar 7:30 hian Punjab FC leh East Bengal te an inkhel ang.