Arsenal-in point thum an hmu

Khel ṭha tawk lo chungin Arsenal chuan an mikhual Sheffield United 2-1 in an hneh a, an elpui club lian ṭhenkhat an mualpho zanah North London club hian point thum hlu tak an hlawh chhuak - champion tur zia a ni mai em?

Emirates Stadium-a inkhelah Gunners lam an hriam tawk lo a; nimahsela mamawh hunah tak Bukayo Saka a che fuh. England tana kohna dawng hlim hian Hector Bellerin-a cross chu tauh lutin minute 61-naah a team hma a hruaipui.

Goal luh aṭanga minute thum hnu lekah bench aṭanga rawn lut Nicolas Pepe-a'n a khung zui, keeper Bernd Leno aṭanga ṭanin vawi 19 ngawt ball an inpek kual hnuah pound maktaduai 72-na Pepe-a'n a hmawr a bawk.

Sheffield tan David McGoldrick-a'n kual mawi takin an si phurh sut ṭhen ve mah se goal dang a luh belh tawh lo a, manager Mikel Arteta naute Premier League match li aṭanga point kua hmuin palina dinhmun an luah.

Gunners manager Arteta chuan, "Season bul kan ṭan dan hi ngun taka ngaihtuah pawhin a ṭha thawkhat viauah kan ngai, kan result chu a chhe lo. Team tinin inbuatsaihna kan nei mumal hman meuh lo, chumi kara kan insiamrem thei hi a lawmawm.

"Kan khelmualah match 10 chhung tlawm loin kan kaltluang thei pawh hi a lawmawm, midang tana inkhelh chakawm lo leh lenluh an hrehna hmun ni turin Emirates Stadium hi siam theih a pawimawh," tiin a sawi.

Arsenal hian an match lehpek atan October 17, Inrinni zanah Manchester City an lenchilh dawn. Etihad Stadium-a an kal hmain international chawlh a awm dawn, City hi league match thum khelh china point li nei an ni thung.

Arsenal hian Champions League mai ni lo 'champion' an sawi chho ngam dawn em?