Euro 2024-ah player tam hret dawn

European football-a thuneitu sang ber UEFA chuan European Championship 2024-a squad tihlen dan a ngaihtuah a, team pakhatin player 23 chauh an neih theih ṭhin chu 26-ah tihpun a ni mai thei.

Thawhṭanni khan UEFA chuan Dusseldorf-ah Euro 2024 khel tura tling ram tin coach-te chu titipuina an nei a, team pakhatin player 23 chauh a neih theih tihpun chungchang an sawipui a ni.

UEFA chuan thuchhuah siamin, "UEFA chuan mi hrang hrang ngaihdante a lawr khawm a, hun rei lotêah kan thutlukna chu puan zar a ni ang," an ti a, Germany-a neih tur inelnaah hian squad-a awm thei zat player hi a pun ngei a rinawm.

Dan hman mek ang chuan European Championship-ah hian team tinin player 23 aia tam an neih a thiang lo a, Euro 2020-ah erawh Covid-19 vanga buaina pumpelh theih nan player 23 aiah 26 chu hman a lo ni tawh.

UEFA chuan squad tihlen chungchang hi Euro 2024 khel turte puala ni hnih workshop an neih denchhenin coach ho an sawipui a, heta an ngaihdan an sawite hi national team competitions committee-ah thlenin, executive committee-ah ngaihtuah leh a ni bawk ang.

Euro 2024 hi Germany-ah khelh tur a ni a, June 14-ah match hmasa ber khelh niin, July 14-ah final khelh tur a ni dawn. Germany-a khawpui 10-in inelna hi thlengin, ram 24-in European football-a ram ropui ber nih an inchuh dawn.

Inelna thlengtu Germany chu tling chiang sa an ni a, anni bakah hian Albania, Austria, Belgium, Croatia, Czech Republic, Denmark, England, France, Georgia, Hungary, Italy, Netherlands, Poland, Portugal, Romania, Scotland, Serbia, Slovakia, Slovenia, Spain, Switzerland, Turkey leh Ukraine te chu inelna hmachhawn tur hian an tling.

UEFA chuan, "Coach-te nena kan inrawnkhawmnaah hian ngaihdan chi hrang hrang ngaihthlak a ni a, ṭhenkhatin squad-a player awm thei zat tihpun an duh laiin, ṭhenkhat erawhin player awm thei zat chu 23 la ni reng se an duh.

"Player tihpun hian an tan training, group management leh national association te tana sum sen a tihhautak theih dan thlengin an sawi a ni," an ti a, ngaihdan chi hrang hrang an ngaithla.