RFDL national group stage Home Missions FC

Reliance Foundation Development League national group stage khel turin Home Missions FC chuan vawiin hian Delhi an pan ang.

Home Mission FC hi Chanmari FC captain leh coach hlui Rochhingpuia'n a ho a, Mizoram zone-ah pakhatna an ni. National group stage khel tur Aizawla zawnnaah Home Mission hi Inkhel FC, Muthi FC, 1st Bn MAP FA leh Kulikawn FC te nen an inel a, pakhatna an ni.

Inelna hi April 14, Pathianni aṭanga khelh tur a ni a, Home Mission FC hi group C-ah NE United FC, East Bengal FC, Delhi, Adamas United SA te nen an awm ho. Group khat aṭang hian a sang ber chauhin stage sang zawk an tling dawn.

Home Missions coach Chhinga chuan, "Kan group-a awmte hi ISL club pahnih NE United FC leh East Bengal FC bakah I League club Delhi FC te an ni hlawm a, group stage paltlang a harsa dawn. Chutihrualin Home Missions-in kan tum ber chu Mizo footballer ṭha zawk chher chhuah a ni a, inelna hmachhawn tura kan zin chhuak hrim hrim pawh hi player-te tan hmasawnna ṭha tak a ni ang," tiin Vanglaini a hrilh.