Graham Potter duhtu an tam

Chelsea duh loh Graham Potter chu European football-a club hrang hrangten coach atana lakluh tumin an hel mek niin khawthlang media-te chuan an tarlang a, tun dinhmuna amah hnim hnai bertu chu Dutch team talbuai Ajax an ni.

Ajax hian tun season-ah beisei an phak lo hle. Pathianni zan khan an hmelma kumhlun Feyenoord chu 6-0 in an ngam lo a, champion chu sawi loh, season thara Champions League khelh phak pawh a harsa tawh dawn.

Dutch club hian season an hman ṭhat loh avangin October thla khan coach Maurice Steijn an ban a, John van 't Schip chuan Coach lailawk hna chelh mekin, season tharah chuan Coach thar an lakluh ngei hmel.

Hetiang a nih avang hian Potter an dawr a, thu thlun fel erawh engmah a la awm lo thung. English coach Potter hi April 2023 khan Chelsea chuan a hna aṭangin an ban a, London club hi league-ah a chet chhiat pui viau chungin Champions League quarterfinal erawh a hruai thleng - mahse, Champions League quarterfinal an khelh hma hian Chelsea chuan an ban.

Brighton & Hove Albion coach hlui hian club thar a zawm dawn a nih chuan, a club thar ruahmanna leh a duhna te chu inmil turin a beisei nia sawi a ni a, Ajax hi a zawm kher ang em, chiang taka sawi theih a la ni lo.

Hetihrual hian Ajax hi khelmual chhungah chauh an buai lo a, pawn lamah pawh chief executive Alex Kroes chuan club inrelbawlna kawngah fel hlel taka thil tih a neih avangin suspend mek a ni.

Potter hi Manchester United nen pawh sawizawm a ni a, Red Devils hian coach Erik ten Hag nei mah se, Dutch coach hian beisei a phak loh avangin season tharah chuan Old Trafford-a a cham chhunzawm tawh loh mai rinna a lian hle.

Manchester United sporting director thar tur Dan Ashworth hi Brighton-ah Potter nen hian an lo thawk dun tawh ṭhin a, sawi zawm an ni hi a awm viau - England coach Graeth Southgate chu Red Devils enkawl tura sawi rik a awm bawk.

Potter hian Swedish club Östersund aṭanga a hming chher ṭanin, Swansea City, Brighton leh Chelsea a enkawl tawh.