Everton an hrem leh ta - tlak a hnai!

Premier League lamin Everton an zuam bik em ni chu aw, tih mai tur a ni a, tun season-a a vawi hnih nan Merseyside club hi an hrem leh ta - sum hman phal zat aia tam an hman avangin point hnih an paihsak.

Everton hi hremna avangin 16-naah an tla thla zui a, relegation zone aṭanga an hlatna chu point hnih chauh a ni ta - Everton hi November khan point 10 paihsak an lo ni tawh a, mahse, an khinglet.

Merseyside club khinletna hi ngaihtuah a nih hnuah, point rukah tihhniam a ni a, mahse, tuna hremna dang pek an nih leh tak avangin tun season-a point an paihsak zat chu point riat a tling phak tho.

Hremna chu

Premier League danah chuan club-ten season thum chhungin pound maktaduai 105 aia tam an hloh thiang lo a, season khatah £35mtd chiah an hloh thei tihna a ni. Everton hi November 2023 khan 2021-22 season thleng chhiara kum thum chhunga an sum hloh a tam avangin hrem an lo ni tawh.

Kha hremna kha Premier League chanchina inhremna na ber a ni a, table-a 14-na dinhmun aṭangin 19-naah an tla hial. Mahse, an khinlet hnuah point 10 an paihsak chu point rukah tihhniam a ni a, an thaw huai.

Mahse, Everton hlim chhung a rei lo. 2022-23 thleng chhiara kum thum chhunga £16.6mtd an hlohna thubuai pakhat zawk chu ngaihtuah leh a ni ta a, Premier League Profit & sustainability rules (PSR) an bawhchhiat avangin hrem an ni leh ta.

Hremna a nep?

Everton hian stadium thar tur Bramley-Moore Dock an sa mek a, hemi sum hman danah pawh fel hlel a awm avangin hrem theih an ni mek - he thubuai erawh kuminah an ngaihtuah hman a rinawm chiah lo thung.

Toffees thubuai ngaihtuahtu commission chuan an bawhchhiatna avang hian point nga paihsak phuah hial an ngai. Mahse, tun season-ah point an lo paihsak tawh avang te, Russian company USM-te nena an thawhhona tihtawp a ṭul avanga an sum hmuh a tlakhniam avang te, an tihsual hma taka an pawm avangtein an chungah zahngaihna an lantir.

Everton chuan thuchhuah siamin, thuneituten an ngenna ṭhenkhat an ngai pawimawh chu lawmawm an tih thu an sawi a, chutihrual chuan thubuai siamsak an nih ṭhin danah thil fel hlel a awmah ngaiin, tuna hremna pawh hi ngaituah ṭhat turin an khinglet dawn.

A chhehvel

Everton hian March 31 khan 2022-23 chhunga an sum dinhmun an puangzar a, £89.1mtd ngawt season khat chhungin an hloh! Season hmasa chhung khan Everton hian club stadium thar sak nan £210.9mtd ngawt an seng a, Russia-in Ukraine a do avangin sponsor £20mtd an chân a, manager Frank Lampard ban vangin £7.1mtd an seng a, board member inthlak kualna lamah £3mtd an seng bawk.

September khan Everton neitu Farhad Moshiri chuan American investment fund 777 Partners hnenah 94% stake hralh a rem ti tawh a, mahse, tun thlengin Premier League chuan hei hi an la pawmsak thei lo.

Everton director of football Kevin Thelwell chuan an sulhnute kalsanin, an inher rem mek thu a sawi a, hun erawh a duh ve deuh thu a sawi. Hetihlai hian Premier League chuan Everton hremna chu an dan siama an tih mai mai lohzia pholanna a nih thu an sawi.