Point 14 zeta fal thei Inter Milan

Inter Milan chuan Serie A nomawi la chawi chiah lo mah se an hnaih ta hle. Simone Inzaghi naute hian Thawhṭanni zan khan Udinese 2-1 in an hneh a, hmahruaitu an nihna an sawhnghet zual leh ta a ni.

Italian football inelna sang berah Inter Milan hian match 31 aṭangin point 82 an hmu a, anmahni hnaih bertu AC Milan chuan point 68 an nei thung, match khelh hmabak pasarih a la awm.

A tawpah Inter

Bluenergy Stadium-a inkhelah mikhual Inter lamin ball chang tamin inkhel pawh an thunun hle a, mahse Udinese goalkeeper Maduka Okoye a che ṭha ve tlat a, goal an khung thei mai lo a, a lo dangchat thei zel.

Chawlhlawk hma hretin Udinese an che fuh ta zawk. Midfielder Lazar Samardzic-a'n box sir kil aṭangin na vak loin goal lamah a pet a, defender Denzel Dumfries leh keeper Yann Sommer te an inringthul a, na lo takin goal kilah a lir lut.

Secona half tirah Carlos Augusto chuan buai deuh nuaih kar aṭangin si phurh sutah a inngai a, mahse VAR hmanga ennawn a nih hnuah offside vanga hnawlsak an ni a, mual neitu lam an him chhunzawm leh phawt.

Mahse, an him rei thei lo - ball kang inchuhna lamah keeper Okoye chuan Marcus Thuram a nem a, penalty a chawi zui. Penalty pettu Hakan Calhanoglu-a'n chiang zeta a khung hnuah ball lain mual laiah a dah let nghal, chak an tum tih a chiang.

Captain armband hrengtu Lautaro Martínez-a'n tawih zetin tauh mah se Okoye bawkin a lo dang. Argentina international Martinez a awm hle hle thei lo, hun tawp dawnah box sir aṭangin goal ban a pet per leh pawp, ball per let hi substitute Davide Frattesi-a'n chakna goal atan a khung.

Inzaghi a lungawi

Goal an phur hmasa a, an sut hnuah pawh rei tak chhung an khung belh thei lo. Hun pek belh minute sarih a ni a, minute linaah chakna goal an khung chauh. A naute beih let danah Simone Inzaghi a lungawi hle.

Inter coach Inzaghi chuan, "Inter Milan tana theihtawp chhuahtu player ka enkawl khawm a, ka vannei hle a ni. Kan hnufual lai leh dinhmun a ṭhat deuh lai pawhin ka naute hi an talbuai ngai lo, hun tawp thlengin an theihtawp takmeuh an chhuah ṭhin.

"Ball kan chang tamin inkhel kan thunun si a, khatiang chung khan chak lo emaw chak zo lo emaw ni ila a hrehawm kan ti ngawt ang a, fans lam pawhin pawm thiam harsa an ti ang, a tawpah erawh kan phu ang ngei result kan hmu," a ti.

Inter hian ball possession 77% ngawt an chang thei a, goal khung tuma 'shot' pawh ṭum 23 tehmeuh an nei, an vanneih ṭum chu ni se goal tam zawk an khung pawh a rinawm, chutihrualin Udinese lamin counter attack aṭangin an bei let na ve thei hle bawk.

Tun kar tawpah Inter hian Cagliari an mikhual zui dawn, an chak a niha an match lehpekah pahnihna ni lai AC Milan an hneh zui bawk a nih chuan Serie A champion an ni fel der thei dawn, engkim an kuta innghat a ni tawh.