Monte Carlo-ah Nagal a chak

Sumit Nagal chuan Monte Carlo Masters khelh laiah world number 38 Matteo Arnaldi a hneh a, clay court inelna Monte Carlo-ah hian main draw chinah Indian player zinga hnehna chang thei hmasa ber a ni hial.

Nagal hi world number 93 a ni a, seeded a chang phak lo - qualifying a paltlang hnuah main draw hi a khel ve phak chauh. Thawhṭanni zan inkhelah a khingpui Arnaldi hi 5-7, 6-2, 6-4 in a hneh, chak tur hian darkar hnih leh minute 37 chhung hun a hmang.

Tun hmain Indian mipa player dang Vijay Amritraj (1977) leh Ramesh Krishnan (1982) ten Monte Carlo-ah hian main draw an lo khel phak tawh a, mahse chak ni hmel an la hmu ngai lo - tunah Nagal hun a rawn inherchhuak ta chiah.

Grand Slam dawta inelna ngaihhlut Masters 1000 hi kum 1990 aṭanga khelh ṭan a ni a, clay court bikah chuan Nagal hi main draw china chak hmasa ber a ni, a match lehpekah chuan season hmasa finalist leh kumina seeded pahnihna ni bawk Holger Rune a tum leh ang.

Kum 26 mi Nagal chuan, "A tirah ṭha taka ka khel chungin set ka hloh nghal a, a hnu lama ka thawh chhuah leh dan kha chu a lawmawm hle. Set hnuhnung pahnih kha chu duhthusama ṭhain ka khel," a ti a, mellung a phun thei chu lawmawm a tih thu a sawi bawk.

Inkhel dangah vawi hnih champion tawh Stefanos Tsitsipas pawh a tlang. Greek tlangval hi Laslo Djere nen an intawng a, 6-3, 3-2 a hma a hruai laiin a khingpui hi hliam vangin a khel chhunzawm thei lo, hah lutuk loin second round a lut.

Seeded pakuana Grigor Dimitrov pawhin fiahna a paltlang, tualchhung tlangval Valentin Vacherot nen inhnehtawk taka an inbeih hnuah 7-5, 6-2 in a chak a, season kal laia a nomawi pahnihna tur a beisei mek zel.

Canadian tlangval Felix Auger-Aliassime-a'n a service ṭha tak a chhawr leh a, aces vawi ruk siam chungin Luca Nardi 6-2, 6-3 in a hneh - a khingpui hi break point pawh hmuh tir miah loin a hneh tlang thei a ni.