Ronaldo hnawhchhuah niah Al-Nassr chak lo

Saudi Super Cup semifinal-ah Al-Nassr chu Al-Hilal lakah 2-1 in an chak lo. Thawhṭanni zan inkhel boruak sang takah hian forward Cristiano Ronaldo chu hnawhchhuah a ni.

Salem Al-Dawsari leh Malcom te goal hmangin Al-Hilal hian si hnih faiin hma an hruai, a hnuah Liverpool forward hlui Sadio Mane chuan goal khat khung ve mah se awmzia a nei phak tawh lo.

Hun tawp dawn minute 86-naah mual sirah Ronaldo hian Ali Al Bulayhi chu a nghawk a, red card pek nghal a ni. Hnawhchhuah a nih avangin Portugal captain a lungawi lo a, hnung lam aṭangin referee chu kutthlak a tum bawk, khelmual a chhuahsan dawnah tihel nan a ban a phar bawk a ni.

Kum 39 mi Ronaldo hian 2022 khan Saudi club Al-Nassr hi a zawm a, inelna hrang hrangah match 61 aṭangin goal 56 a khungsak tawh a, nikum khan Arab Club Champions Cup a lakpui.

Vawi thum champion tawh Al-Hilal hian final-ah chuan Al-Ittihad an tum ang. Semifinal lehlamah Al-Ittihad hian Karim Benzema leh Morocco forward Abderrazak Hamdallah te goal hmangin Al-Wehda chu 2-1 in an lo hneh ve thung a ni.