Heat hun a thleng ve ta

NBA Finals 2020-ah Miami Heat chuan mualpho taka tlawm ngawt an duh bik lo. Nimin zing game 3 inkhelah Heat hian Los Angeles Lakers chu 115-104 in an hneh a, best-of-seven series khelh kal laiah Lakers zawkin 2-1 in hma an la hruai.

Game hmasa pahnih an lak hnuah Lakers an chesual a, a tir aṭanga a tawp thlengin dinhmun hniam zawkah an ṭang. Nilaini zing dar 6:30-ah game 4 khelh a ni dawn, basketball thiam ber hre tur chuan nghah leh rih deuh a ngai dawn.

Rinkai lo zawk ni mah se Miami Heat hi final lut thei an nih avangin anmahniah theihna a awm tih a chiang. Nimin zing AdventHealth Arena a inkhelah Heat tan Jimmy Butler chuan a theihna tak a pho chhuak a, a team a chakpui.

Hliam damkawr Butler hian - 40 points, 13 assists leh 11 rebounds a nei. Hliam vangin Bam Adebayo leh Goran Dragic te inlan thei lo mah se American guard hian a ṭhiante a kep hneh hle, game 4-ah pawh a hmuhnawm chhunzawm ang.

Butler chuan, "Coach hnenah inkhel turin ka inpeih tih ka hrilh a, hetiang inelna sangah hian min mamawh ang taka ka khelh tur thu ka hrilh bawk," tiin match khelh hma aṭanga a inrintawk thu a sawi. Coach Erik Spoelstra pawhin a player khelh danah a lungawi thu a sawi ve bawk.

LeBron James leh Anthony Davis te meuh pawh Butler khelh ṭhat zan chuan an ropuina hnuh hniamsakin an awm. James-a'n point 25 bakah rebound vawi 10 lain double-double chu a nei a, Davis erawhin point 15 bak a nei thei lo.

Lakers hi match tir lamah an buai nghal, quarter hmasa berah turnover vawi 10 ngawt neiin point 13 zetin an hnufual nghal a, a tawp thlengin an tho chhuak hlei thei lo. Minute kua chauh khelh hmabak la awmah 91-89 in hnaih ve mah se Butler bawkin a zawna point riat neiin Heat a chakpui.

James chuan, "Jimmy khan thil engkim a thunun vek, Heat lamin an mamawh ang zawng zawng a pek thei avangin keini tan dan theih a ni lo. Inkhel pawimawh takah player khel ṭha bik an awm chuan fak an phu," tiin an elpui player Butler a dahsang thiam hle.