Jadeja-a'n CSK a chakpui

Indian Premier League-ah Chennai Super Kings-in chak hmel an hmu leh ta a, Thawhṭanni zan khan Kolkata Knight Riders chu wicket sarihin a hneh.

MA Chidambaram Stadium, Chennai-ah mikhual team-in an bat hmasa a, Ravindra Jadeja-a'n 18 runs chauh pein wicket thum a la. KKR hian over 20-ah 137 runs chauh an siam a, wicket kua a hloh bawk.

Kolkata tana che ṭha ber Shreyas Iyer-a'n 34 runs chauh a siam a, thlawptu ṭha a nei lo. Chennai tan opener Ruturaj Gaikwad-a'n ball 58 hmachhawnin thi loin 67 runs a siam bakah Daryl Mitchell (25 runs) leh Shivam Dube (28) ten an belh bawk a, over 17.4-ah 141/3 runs siamin nehna an chang.

Zanin dar 7:30 Rajasthan Royals leh Gujarat Titans te an inkhel dawn a, Rajasthan hi match li khelh tawhah an la chak vek.