Inter Kashi leh Sreenidi te inhnehtawk

I League-ah champion tur a chiang tawh a, Sreenidi Deccan-in anmahni hnaih bertu Inter Kashi lakah point khat hlawh chhuakin pahnihna an ni chiang tawh bawk.

Thawhṭanni zan inkhelah hian Sreenidi Deccan-in David Munoz hmangin minute 41-naah an khung hmasa a, minute 87-naa Julen del Pino penalty hmangin mualneitu Inter Kashi-in an sut.

Sreenidi hian match 23 aṭangin point 45 an hmu a, pahnihna an ni chiang tawh. Inter Kashi-in match 24 an khel tawh a, point 41 hmuin pathumnaah an awm mek. Palinaa awm Real Kashmir-in match hnuhnung bera Namdhari an hneh chuan pathumnaah an inhlang chho thei ang.

I League match tawp ber hi April 13, Inrinni zanah khelh a ni dawn a, Mohammedan SC-in an mual Naihati Bankimanjali Stadium-ah champion nomawi an chawi dawn.