Arsenal leh Bayern Munich an inhnehtawk; Munich-ah semifinal lut tur chinfel a ni ang
Thawnthu danglam ziah an tum a, an dai ngai loh leh tihtheih ngai loh tih an tum bawk - beiseina leh theihna sang tak nei mah se Arsenal tan kawng awlsam erawh a ni lo, an mikhual Bayern Munich nen 2-2 in an inhnehtawk.
Bukayo Saka goal hmahruai chu Bayern lamin Serge Gnabry leh Harry Kane te hmangin an chhanglet a, hun tawp dawnah substitute Leandro Trossard chuan si phurh a sut a, chak zawk awm loin an ṭin.
April 17, Nilaini zanlaiah Champions League quarterfinal second leg hi khelh a ni leh dawn, a hmun atan Allianz Arena a ni tawh ang a, inhnehtawk awm loin tlang tur zawk chinfel nghal a ni tawh ang.
Inkhelh hma boruak
Bayern Munich hian group match an khelh laiin buaina an nei, an khingpui Copenhagen leh Lazio te an hmachhawn ṭumin fans lamin khelmualah meithallawn (fireworks) an vawm lut a, hrem an tawrh phah.
Fans chet dan avang hian German club hi Emirates Stadium-ah fans hruai thei loa hrem an ni, stadium khat tlatin Arsenal ṭantute an pungkhawm a, puanzar (flag) hrang hrang kengin thawm bengchheng tak nen mikhual an lo thleng.
Thomas Tuchel-a'n striker ṭha Kane thlawp turin English football-a tawnhriat nei ṭha Leroy Sane leh Arsenal player hlui Serge Gnabry te a dah a, an hnungah Jamal Musiala leh Leon Goretzka te an awm bawk.
Gunners lamin player hman rim ho an tidanglam tam lo, tlarhnung sirah Jakub Kiwior awmin defender dang pathum chu a ngai - Gabriel, William Saliba leh Ben White te an ni - Declan Rice leh Jorginho an ding dun bawk a ni.
Boruak inthlak
A tir aṭangin boruak a nung nghal - Gabriel Martinelli chuan Saka awmna lam aṭanga ball chhuak chu goal sirah a pet nghal pawp a, keeper ṭha leh tawnhriat ngah Manuel Neuer-a'n fimkhur a ngai tih a takin a hre nghal.
Saka a inlar chhunzawm, England international forward hian a thiam dan takin ball a la zeuh a, box chungah player pathumten lo hmachhawn mah se goal thlang lam kilah a thlawh lut nghal zawt - Arsenal chu phur vet vet tak an ni.
Mahse, Gunners lawm chhung erawh a rei lo. Defender Gabriel-a'n ball a pe sual a, awlsam zawka pek theih tur keeper David Raya awmna tur hmun a fuh tawk lo bawk nen holam takin ball an hloh.
Bayern hian rang lutuk tak maiin an vaw let - Goretzka chuan hlauhawm taka lir lutin Gnabry a rawn dawk chhuak a, ani hian Raya kapkarah a khung. Vawi leh khatah boruak a inthlak danglam.
Bavarians lamin mahni inveng chungin counter attack an hmang a, mual sira an player tlan chak pahnih kutah an innghat thui hle. Manchester City player hlui Sane-a'n box chhungah chak zeta ball a ken chu Saliba-a'n titluin penalty a chawi.
Penalty pet turin Kane a rawn ding chhuak - Tottenham striker hlui hian Raya zuan lohna lamah cool takin a khung a, chawlhlawk an hman meuh chuan mikhual lamin 2-1 in hma an hruai let der tawh.
Inhnehtawk
Tun hmain Arsenal hian Champions League knockout stage chinah Bayern Munich hi an la hneh ngai lo, an intawn hnuhnung ber chu 2017 kha niin last 16-ah Bayern hi aggregate-ah 10-2 in an chak.
Arsenal hian an ze ngai an chhuah leh dawn niin a lang hman a, ni danga chesual khat tak mai Gabriel leh Saliba te meuh pawh an nghet lo a, goal dang an chhuah belh lo chu an vannei - White-a'n fal taka awm tawh Sane a dan te chu ṭha tak a ni.
Mikel Arteta-a'n striker Gabriel Jesus leh Trossard te a dah luh hnuah boruak a danglam leh hret. Brazil international Jesus thawh ṭhat rah sengin Trossard hian si phurh sutna goal a khung.
Hun tawp dawn tak takah Arsenal hian penalty an beisei. Saka-a'n box chhungah ball a la lut a, keeper Neuer rawn chhuak hma nen in nangchingin Saka hi a tlu a, an ke a in bakkaih ngei bawk.
Mahse, referee-in penalty a pe lo. Neuer ke chu tawk ngei mah se Saka khan a pal zawk niah a ngai a, hun a tawp chhunzawm mai bawk. Gunners player-te zualkoin sawi nasa viau mah se awmzai a nei lem lo.
Bayern pawhin penalty beisei pakhat zawk pek loh an ni ve bawk. Referee-in goal kick tura a tih hnuah Gabriel-a'n a kuta ball khawih a nei, hemi ṭum hian Bavarians lamin sawisel viau mah se awmzia a nei bik lo bawk a ni.