Vawiinah MFA Cup vawi 22-na semifinal ; Siaha Vs Aizawl; Lunglei Vs Lawngtlai

MFA Cup vawi 22-na semifinal chu vawiin hian CYLA Ground-ah khelh a ni dawn. Siaha aiawh Model United FC-in chawhma dar 11:00-ah Aizawl DFA First Division champion FC Bethlehem an hmachhawn ang a, chawhnu dar 2:30-ah Lunglei aiawh Venglai FC leh Lawngtlai aiawh MLS FC te an inkhel ang.

MFA Cup hi Lawngtlaiin an thleng a, tun ṭum inelnaah hian MFA hnuaia district hrang hrang 11 ten team an nei thei vek. Team 11 hi group pahnihah ṭhen an ni a, vawi khat ṭheuh an inkhelh kual hnuah group pahnih aṭangin a sang pahnih ve vein semifinal an lut.

Siaha Vs Aizawl

Siaha club Model United FC hi inelna ṭan hmain team ṭha zinga ngaih an ni lo a, inelna ṭan hnuah erawh an ṭha tih nemnghehin a awm. Coach B. Vabeichakao hote hian match nga aṭangin goal 19 an khung thei a, chak loh an nei lo.

Model United hian match hmasa berah champion rinkai ni pha Khawzawl Vengthar chu 4-3 in an hneh a, Saidan GSA (3-0) leh FC Serchhip Kawnpui (8-1) te an sawp thei ve ve bawk. Siaha club tan Lalhriatchhunga'n goal ruk a khung tawh a, Inkhel FC aṭanga loan hmanga an lak FA Pahnai-a'n goal hnih a khung tawh bawk.

Chutihrualin Siaha club hian goal riat zet an chhuah a, FC Bethlehem hneh turin tlarhnung rem phui a pawimawh ang. FCB coach Lalhriatpuia Sailo-in tun hnaiah AFC C Licence Coaching Course a a kal a, khelmuala a rem hriatna a tihpun ngei a rinawm.

FC Bethelehem hian MFA Cup atan RH Laltlanhlua, Lalrinhlua leh Vanlalawia te an lak belh a, chutihrualin team chakna erawh LPS Cup-a best player Joseph Lalṭhafela a la ni reng. Kiran Chettri pawh midfield-ah a pawimawh ṭhin. Group match-a an khelh dan aṭanga thlir chuan Model United hi ṭha zawka ngaih an ni a, mah se Aizawl club FCB hi stage sangah dah hniam a rem lo ang.

Lunglei Vs Lawngtlai

Chawhnu dar 2:30-a inkhel tur Lunglei club Venglai FC leh Lawngtlai club MLS FC hi a hmuhnawm tur zawka ngaih a ni a, chak tur pawh hriatthiam a har hle. Venglai hi group B-ah pakhatna ni mah se MLS FC hi inelna thlengtu an ni a, ṭantu pawh an nei ṭha dawn.

Lunglei hian goal nga chauh an khung a, goal hnih chauh an chhuah. An goal nga khung hi player panga Lalpekhlua Jongte, MC Lalsangliana, C. Chanchinmawia, Lalthanzuala leh Jonathan Lalruatmawia Fanai te khung a ni. Mimal goal khung thei bik an awm lo.

MLS FC erawhin goal 14 an khung a, Aizawl DFA club Kanan FC aṭanga an lak Richard Rohmingliana'n (Mahmingtea) goal sarih a khung tawh. HC Malsawmtluanga pawhin goal thum khung tawhin Savuta (2 goals), Falton N Beirachakhei (1 goal) leh Vanlalhruaitluanga (1 goal) ten goal an khung tawh bawk.

Lawngtlaiah MFA Cup-in ngaihhlut a hlawh a, MLS FC-in nomawi an chawi chuan mipuiin an hlut lehzual ang. Chutihrualin MLS-in champion tur chuan vawiin hian fiahna hautak an hmachhawn a ṭul dawn a ni.