Santiago Bernabeu-ah UCL inkhel hmuhawm bik; Real Madrid 3 - 3 Manchester City

Champions League-a vawi 14 zet champion tawh Real Madrid-in April 9, Thawhlehni zan khan champion lai Manchester City an mikhual a, Europe club ṭha bikte khelh ṭhin UCL-ah pawh inkhel hmuhnawm bik pho chhuakin 3-3 in an inhnehtawk.

Santiago Bernabeu-a inkhelah Bernardo Silva hmangin City-in hma an hruai a, Ruben Dias-a'n an lama a tihluh aṭanga minute hnihna lekah Rodrygo-a'n Real hmahruaina goal a khung. Mahse, Phil Foden leh Josko Gvardiol te goal ropui hmangin City-in second half-ah hma an hruai nawn a, mualneituin Federico Valverde hmangin si phurh an sut.

Minute 90 chhungin chak zawk an awm lo a, ennawm hmuhnawm hi Etihad Stadium-ah April 17, Nilaini zan dar 12:30-ah chhunzawm a ni ang. UCL-ah away goal rule a awm tawh lo a, an inhnehtawk nawn a nih chuan extra time minute 30 khelh tur a ni. Chak zawk an la awm loh cheu chuan, penalty shootout hmangin chak zawk an zawng ang.

A nung nghal

Real Madrid-in an mual Santiago Bernabeu ṭha lehzuala hman ṭangkai an tum a, UEFA hnena an dil angin a chung khuh an phalsak. Los Blancos ṭantute thawm a rin phah sawt beisei a ni a, mah se City-in goal an khung hmasa zawk.

Jack Grealish-a'n freekick a hlawh chhuak a, Real keeper Andriy Lunin-a'n 'wall' pangngai awm ṭulah a ngai lo a, a hmingin pakhat a dah. Minute hnihna lekah Bernardo Silva-a'n cross loin goal-ah kawh zetin a pet a, Lunin-a'n a dang hman lo - City-in goal an khung hmasa zawk.

Goal khat chhuah vangin Real an hnual lo a, inkhel a nun phah hle. Minute 12-naah Eduardo Camavinga-a'n box pawn aṭangin goal-ah a pet a, Rúben Dias-a ke perin goalkeeper Stefan Ortega chet lohna lamah ball a kal a, 1-1 a ni.

Minute hnih hnuah counter attack hmangin Real-in an chhu let a, Vinicius Junior-a ball pek luh chu Rodrygo-a'n um lutin Manuel Akanji a muang hret. Box chhungah Rodrygo rilru a fim a, 'cool' zetin a pet lut.

Ball pet thiam

Player thiam rual inkhel zingah theihna nei sang bik an awm a, Jude Bellingham-a'n a theihna tak a lantir thei lo chungin second half ṭantirhah City tlarhnung rum ṭhaihin goal zawnah a pet lo thung. City-in goal an mamawh tih an hria a, ball inpe kual ngamin goal khung theihna chance an zawng.

Real lamin tlarhnung an tiphui ṭha a, Erling Haaland an chance ṭha insiam thei lo mah se Phil Foden-a'n a ball pet thiamzia a pholang. John Stones hnen aṭanga a ball hmuh chu Foden-a'n pet nuam tur tawka a tihper zeuh hnuah goal kilah tak a pet lut a, minute 66-naa City goal khung hi goalkeeper tan dan ngaihna a awm lo.

Foden-a theihna neihsan chu mi nawlpui hriat sa a ni a, Croatian defender Gvardiol pawhin ball a pet thiam tih a rawn pholang zui. Minute 71-naah Grealish-a ball pek chu Gvardiol-a'n pet nuam tura a siam rem hnuah goal kilah a hlai lut a, a mawi takzet.

City-in 3-2 in hma an hruai leh ta zawk a, mah se Real-in player 'class' an kawl. Luka Modric-a'n mual sir lamah Vini Jr tlan chu hmuin a pe a, Brazilian forward hian box chhungah cross lutin, leia ball a tlak hmain Valverde-a'n a volley nghal - goal kilah a lut. Santiago Bernabeu-ah goal ruk a lut a, minute 79-naa Valverde goal khung hi a mawi berah a ngaih theih.

A behbawm

City thiampuipa Kevin de Bruyne chu a damloh avangin bench-ah dah a ni a, Pep-a'n inkhel boruak sangah player pakhat chiah a thlak. Phil Foden aiah Julian Alvarez a luhtir a, player dang a thlak lo.

Tun hnaia sawisel hlawh Erling Haaland a khel tluan a, goal a khung lo. Norwegian striker Haaland hi Real defender Antonio Rudiger-a'n a dah ṭha a, City-in football hmuhnawm an khelh zanah a reh hle.

Julian Nagelsmann-a'n tun hnaia Germany tana khel tura a koh kir Toni Kroos-a'n a theihna sang tak a pholang leh a, Real midfield khaikhawmtu a ni. Kum 34 mi Kroos hi kum 38 mi Luka Modric-a'n a thlak a, Croatian midfielder pawhin a thiam thil a la theihnghilh lo. Mahse, Real-in hrem vangin Aurélien Tchouaméni an chhawr thei lo ang.

Team pahnihin squad an nei ṭha a, quarterfinal-ah an inhmachhawn miau avangin team ṭha pakhat zawk hian semifinal an thleng zo dawn lo. Etihad Stadium-ah chak zawk an awm tawh dawn a, second leg en a châkawm tawh takzet.