Djokovic tan hna a harsa lo

Mipa tennis world number 1 Novak Djokovic chuan harsa vak loin Monte Carlo Masters khelh laiah third round a lut - Serbian star hian a khingpui Roman Safiullin chu 6-1, 6-2 a hnehin second round a paltlang a ni.

Indian Wells lama beisei a phak loh hnuah Djokovic hi Miami Open aṭangin a inhnukdawk a, tunah chuan ṭha pangngai takin a inkhel thei leh ta a ni. Thawhlehni zan inkhel hi ruah surin tibuai deuh mah se Novak a buai phah lem lo.

Clay court season bul ṭantu Djpkovic chuan, "Beisei phak baka ṭhain ka khel, match khat pumpuia game thum chauh ka hloh a nih chuan ka khel ṭha tih a chiang, game ka hloh hoah pawh kha uiawm taka lak loh te an ni hlawm," a ti.

Grand Slam vawi 24 champion tawh Djokovic hian tun hnai khan Roger Federer khumin world number 1 ni thei upa ber dinhmun a chelh, kum 36 leh ni 321 mi ni chungin ranking sang berah a awm thei a ni.

Djokovic chuan, "Thawhṭanni khan Rohan Bopanna nen kan inhmu, ani kha mipa doubles huanga world number 1 ni thei upa ber a ni a, kan pahnih kum belhkhawm chu kum 80 a tling.

"Mahse kum 80 belhkhawmah khan kei aiin a thawh hlawk zawk," tiin a sawi. Indian player Bopanna hi tunah kum 43 mi a ni tawh a, tun dinhmunah doubles huangah world number 1 a la ni thei hial a ni.

Inkhel dangah Hubert Hurkacz chuan fiahna a paltlang, a khingpui Jack Draper chu 6-4, 3-6, 7-6(2) a hnehin second round a inhlangkai a, a tir lamah inkhel thunun viau mah se a hnu lamah an inchai tawk hle.

Tun hma lama Monte Carlos Masters champion tawh Stan Wawrinka erawh a chak lo, tunlai player ṭha zinga mi Alex de Minaur lakah 6-3, 6-0 in a chak lo a, a vanglai a pelh tawh avangin result ṭha neih a harsat ta a ni.

Champion tura rinkai zinga mi Carlos Alcaraz erawh hun tepter tawh takah a inhnukdawk. Spanish star hi seeded pathumna pek ni mah se a ban dinglam hliam vangin a khel dawn lo, season hmasa ang bawkin a khel dawn lo tihna a ni.

World number 3 Alcaraz chuan, "Tournament ṭan dawn tak tak thleng khan ka inkhelh theih kha ka beisei, mahse ka ban ding lam vangin ka inkhel thei dawn lo, nakkumah chuan inlan theih ngei ka beisei," a ti. Alcaraz ang bawkin Rafael Nadal pawh a lo inhnukdawk tawh bawk.

Tennis clay court season an hmang chho mek - May thla chawnu lamah hian tun season chhunga Grand Slam pahnihna French Open an khel dawn a, player-te ten Paris pan tura inbuatsaih a ngaih vanglai tak a ni.