Aizawl FC-in AIFF lakah point ruk an phut

I League-ah Aizawl FC-in match hnih khelh hmabak an nei a, amaherawhchu Trau leh Neroca te Aizawla an rawn zin duh loh avangin AIFF-in match khelh hmabakte chu ṭhulh a nih thu an puang.

Aizawl FC neitu Robert Romawia Royte chuan, "Manipur club pahnih rawn zin duh lo hi mak ka ti. AIFF-in an rawn tir thei lo hi a makna belhchhahtu chu a ni. Football nawmna chu a taka inkhelh hi a ni a, mahse a thleng dawn ta si lo," tiin AIFF-in inkhelh hmabak pahnih an ṭhulh chu pawi a tih thu a sawi.

April 9, Thawhlehni zan khan Mizo club leh Trau te hi RG Stadium-ah inkhel tur an ni a; April 13, Inrinniah Neroca nen inhmachhawn leh tur an ni. Mahse, I League aṭanga relegate pahnih Manipur club pahnih an inthurual a, Aizawla rawn zin an duh lo.

Robert Romawia chuan, "Match hnihah hian point thum ve ve min pe lo a nih chuan a ṭul angin hma kan la ang. Point ruk pawh chu hmu ta reng ila, inkhel loa point hmu kan nih dawn avangin lawm a kim chuang lo," tiin point ruk hmuh a beisei thu a sawi.

AIFF hian inkhel tur pahnih ṭhulh an nih thu hi an tichiang tawh a, Manipur club hremna emaw Mizo club point hmuh zat tur emaw an la tichiang lo. Mizo tlangval Lalrinzuala'n tun season-ah goal 15 a khung a, match hnih an khelh theih dawn loh avangin inelna pumpuiah top scorer a ni dawn lo tih a chiang nghal.

Aizawl FC hian match 22-ah point 25 an hmu a, AIFF-in match hniha point ruk a pek theih chuan a chhe berah pakuanaah an awm ang a, pasarihnaa an awm theih dan a la awm bawk.

Mizo club-in inkhelh hmabak an neih tawh loh avangin club neitu Robert Romawia Royte chuan April 9, Thawhlehni zan khan an chenna inah chaw hlui a buatsaih sak a, hei hi tun season atana team anga inhmuh khawm hnuhnun ber tur a ni.